[17 de maio] España déixanos sen fala

Nun país como Galiza, onde a lingua nacional permanece minorizada, deturpada e apartada de facto, o combate pola normalización ten por forza de ser diario, constante e orientado cara a consecución do monolingüísmo social na lingua propia. O 17 de maio ten que ser unha data de fonda denuncia, sinalando con precisión onde están, quen son e que intereses moven os inimigos da lingua galega: un ensino españolizado, un poder político sucursalista e un poder económico que se sinte cómodo no marco da España única, tamén no lingüístico, porque derrubar as barreiras do idioma é para a plutocracia un triunfo tan importante como as arancelarias ou de calquera outro tipo que se opoñan ao libre comercio das persoas e as cousas.

A mocidade rexistra unhas estatísticas tan baixas de emprego habitual do galego, e mesmo de coñecemento, que non fan estraños descarados xestos de marxinación cara a nosa lingua. Ese é o obxectivo, e ese é o escenario que nos deixan a quen queremos morar na nosa Terra e na nosa Lingua: sentirnos estranxeiros na nosa Patria, obxectores de consciencia nun proxecto nacional alleo, vestixios dunha época de fame e pobreza que os nosos avós deixaron atrás. O galego é o vello e pouco acorde a España. O castelán, idioma moderno, cosmopolita e non aldeán. Para denunciar esta situación levamos a cabo unha acción simbólica onde silenciamos diversas estatuas para mostrar publicamente a situación de marxinación e discriminación que sofre o noso idioma.

Mobilizacións de Queremos Galego

A plataforma Queremos Galego celebra un ano máis o 17 de maio con distintas mobilizacións en todo o país, que nesta ocasión se convocan baixo o lema “O galego, garantía de futuro” nas seguintes cidades e vilas:

• Vigo: Cruce da Vía Norte con Urzaiz. Ás 12.00 horas
• Santiago de Compostela: Praza das Pratarías. Ás 12.00 horas
• Ferrol: Praza do Cruceiro (Canido). Ás 12.00 horas
• A Coruña: Diante do Teatro Rosalía (Rego da Auga). Ás 12.00 horas
• Pontevedra: Praza da Peregrina. Ás 12.00 horas
• Lugo: Praza Anxo Fernández (tras o concello). Ás 11.30 horas
• Ribadeo: Catro Rúas. Ás 12.00 horas
• Ourense: Praza da Imprenta. Ás 12.00 horas

.

>> Galería de imaxes da acción.