[17 de maio] O galego dános un lugar no mundo

O 17 de maio ten que ser unha data de fonda denuncia, sinalando con precisión onde están, quen son e que intereses moven as inimigas da lingua galega: un ensino españolizado, uns organismos políticos sucursalistas e un poder económico que se sente cómodo no marco da España única; tamén no lingüístico, porque derrubar as barreiras do idioma é un triunfo imprescindíbel.

O combate colectivo polo galego radica en defender que o noso idioma é unha lingua máis no mundo e con ela poder interpelar directamente ao resto de pobos por igual. O galego dános un lugar no mundo.

Fronte aos atrancos e ao abandono institucional da Xunta e do Goberno estatal, o galego vive grazas á iniciativa popular que día a día tece redes colectivas e dota de vida ao noso idioma, negándose a deixalo morrer. Non o podemos esquecer, só o pobo salva o galego.

Loitemos por mudar esta realidade, falemos galego!