[25 de xullo] Estamos construíndo a República Galega

Un ano máis, Isca! estivo presente na movilización nacional do Día da Patria agrupada nunha ampla comitiva encabezada por Galiza Nova e defendendo xunto a milleiros de galegos os nosos dereitos nacionais nun momento especialmente complexo polo contexto de crise económica, recortes sociais e reaxir do españolismo (como se comprobou co desenlace do Estatut catalán). Todo isto acrescentado polas actuacións do PP no goberno da Xunta encamiñadas á persecución da nosa lingua.

É por isto que o 25 de xullo deste ano presentouse como unha ocasión fundamental para amosarmos a forza do noso pobo e a vixencia do noso proxecto político desde coordenadas anticapitalistas e independentistas. Estas tiveron a súa expresión en forma de faixas coladas pola nosa militancia en diferentes lugares do percurso da manifestación, denunciando a situación de crise capitalista e pulando pola independencia e o socialismo, como se reflectiu tamén nas consignas berradas durante a mobilización.

A nosa organización estivo presente tamén no Festigal, onde contou cun posto de información e material compartido co Movemento Galego ao Socialismo e no que, ao igual que na manifestación, repartiuse o noso voceiro Combater e máis o colante editado para o propio 25 de xullo deste ano.

Un ano máis, aumentamos a nosa presenza no Día da Patria, catro anos despois da nosa primeira aparición, en 2006. Desta volta afortalados após a nosa última Asemblea Nacional, celebrada en marzo deste ano, onde nos reafirmamos no noso proxecto, hoxe máis vixente que nunca. Defendemos a inviavilidade do desenvolvemento do noso pobo no marco xurídico-político do Estado, así como a imposibilidade de acreditar nun sistema que oprime a nosa clase.

É por isto que convidamos a mocidade nacionalista galega a participar dunha alternativa que traballa no seo do BNG e de Galiza Nova con coherencia e sen complexos pola independencia e o socialismo, pola defensa intransixente da nosa lingua, polos dereitos das mulleres e da nosa clase. Hoxe, non cabe ningunha dúbida: con España non temos futuro. Cómpre traballar por unha República galega soberana e socialista.

A seguir podes ver unha galeria de imaxes da mobilización: