25 de xullo: patria e revolución!

Chega un novo Dia da Patria, unha data que para nós marcou sempre no calendario unha xornada de reivindicación e loita. Unha loita que hoxe se fai mais necesaria que nunca, no medio dunha ofensiva continuada por parte dos gobernos e o capital contra os nosos dereitos como nación e como clase.

Nun contexto como este de ataques descarnados do capital, cumpre lembrar mais que nunca que non entendemos a liberación nacional sen a social e viceversa. Sen patria non hai revolución, e sabemos que nunha nación colonizada como a nosa non hai proxecto soberanista viábel que non pase pola esquerda, igual que non se pode defender coerententemente as clases populares sen cuestionar a nosa opresión nacional.

Hoxe máis que nunca faise evidente que os dereitos non se regalan, conquístanse. Por iso sabemos que só loitando poderemos garantir un futuro digno para o pobo traballador desta nación negada.  O Dia da Patria é un bo momento para demostralo.

A manifestación nacional convocada polo BNG sairá, como cada ano, ás 12h da Alameda de Compostela, e nela a mocidade organizada en Isca! participará activamente e farase ver e escoitar máis que nunca.