6-D A Constitución é herdeira do fascismo

A constitución Española é o principal atranco legal para acadarmos o noso obxectivo de soberanía plena para o pobo galego. É un auténtico cabalo de Troia que se nos vendeu como garante da democracia após a ditadura franquista mais que realmente só foi e é unha ferramenta máis para que a oligarquía española manteña os seus privilexios mentres procura o sometemento de pobos como o noso.

A Constitución contén artigos descaradamente antidemocráticos. Negan o dereito dos pobos á súa autodeterminación, consagran a imposición do castelán na sociedade, institúen a anacrónica figura do rei, dan potestade ao exército español para defender a integridade territorial ou priorizan o pago da débeda pública fronte aos servizos sociais.

O noso pobo, sometido a un sistema capitalista criminal e inheremente corrupto, a un patriarcado en ofensiva e a un réxime español que nos prohibe vivir do noso e nos empobrece, só ten a soberanía e a independencia como vía para a construción dun futuro diferente, deixando atrás opresións de todo tipo e onde os dereitos políticos e sociais do pobo traballador estean garantidos e non poidan ser mercadoría para extraer lucro. Todo iso pasa por rachar co réxime capitalista español porque non existen reformas nin camiños intermedios. Baixo a súa constitución continuísta do franquismo non será viable ningún proceso revolucionario, nin a construción dun sistema diferente que transforme de raíz o paradigna económico e social.

6 de decembro, nada que celebrar!