6 de decembro. Con España non temos futuro!

Cada 6 de decembro asistimos á ladaíña imposta da conmemoración da Constitución Española, herdeira directa do réxime franquista anterior que naceu como remate á denominada transición. Consagrou a reforma do franquismo, que non ruptura, conseguindo que os mesmos que ostentaron o poder sempre non o perderan, sendo vendido isto como unha nova e avanzada democracia.

Galiza é unha nación dependente e empobrecida no económico, no político e no cultural, sen soberanía nin poder de decisión baixo políticas españolizadoras, negadoras e centralistas que teñen como fin a nosa completa destrución como pobo e que abranguen todo o que nos rodea, desde o modelo e os contidos do ensino até a prohibición de vivir dos nosos sectores produtivos. O marco constitucional actual dá forma a esa discriminación e a esa negación, por iso o rexeitamos: non temos nada que celebrar.

Unha constitución que prohibe expresamente o exercicio da autodeterminación, negando os dereitos dos pobos a elixir libremente o seu futuro, e é o garante da “Unidade de España“. A celebración dunha consulta popular onde se expresase a vontade política do pobo catalán sobre o encaixe territorial do seu país foi prohibida en varias ocasións polo Tribunal Constitucional. E prohíbese porque o proceso soberanista catalán é hoxe a maior ameaza para a estabilidade do réxime español e o sistema que sustenta, pois aspira a tronzar ese “consenso constitucional“. Esa constitución que chega a reflectir como deber das Forzas Armadas o de manter a indivisibilidade do Estado.

Unha Constitución que nos impón a obriga de coñecer o castelán mais non o de coñecer o galego, en situación de exterminio xeralizado cunha merma de falantes moi aguda. Unha Constitución que blindou a xefatura do estado a unha figura de plena confianza de Franco e que xurou nas cortes os principos do “movimiento nacional“. Unha vez abdicado Juan Carlos I este mesmo ano, o poder pasou de xeito directo e sen consulta popular ao seu fillo, Felipe VI, nunha rápida e opaca coroación. Ao final, nada cambia.

Unha constitución que non só non nos ofrece solucións fronte a actual crise económica senon que foi reformada de xeito fulminante e sen debate de ningún tipo para consagrar o pago da débeda aos bancos (que pasa a ser a prioridade das administracións públicas, quitándolla aos servizos públicos, sanidade, educación ou pensións).

Rachar coa constitución, co réxime capitalista español é a única saída para conseguir ter un futuro digno na nosa terra. Entendemos a soberanía e a independencia como a vía de saída do capitalismo e o único camiño para a construción dunha alternativa sistemica diferente puidendo construir un sistema que transorme de raíz o paradigma económico e social, o socialismo. A conquista dunha República Galega plenamente soberana que enfronte os monopolios e que rache de xeito unilateral coas estruturas imperialistas das que fai hoxe parte o Estado Español como a NATO, o FMI ou a UE.

Como resposta á conmemoración do aniversario da Constitución Española que ten lugar cada 6 de decembro, Isca! decidiu reeditar unha campaña de denuncia da mesma, en canto que supón a maior plamación legal da negación dos nosos dereitos nacionais.

.