[A Coruña] Construíndo a República en Catalunya + festa

Como xa temos analizado, o proceso soberanista catalán é hoxe a maior ameaza para a estabilidade do réxime español e o sistema que sustenta, pois aspira a tronzar por fin o “consenso constitucional” herdeiro do franquismo. Cómpre entender a independencia como a ferramenta imprescindíbel que nos permitirá tomar as redes do noso futuro e transformar radicalmente a realidade. Evidentemente, dispor dun estado propio non supón por si mesmo un cambio de sistema socio-económico mais é unha necesidade imprescindíbel se queremos dispor de condicións reais para facelo.

É, pois, o proxecto independentista o único transformador digno de tal nome e, amais, a única vía posíbel, nestes momentos, de ruptura democrática co réxime para abrir as portas a un proceso constituínte co dereito a decidilo todo. De como avanza e se constrúe a nova República organizamos unha palestra coa presenza do deputado da CUP-Crida Constituent Albert Botran o vindeiro sábado 27 a partir as 19:30h no pub O Patachim (Rúa Beiramar, 16. A Coruña).

Ao rematar, e co gallo de realizar un pequeno convivio anterior á XV Asemblea Nacional do BNG do día seguinte tamén na cidade da Coruña, organizamos unha festa con petiscos e pinchada de música.

Pásao e pásate!