[A Coruña] Festa solidaria cos compañeiros sancionados

Hai semanas dabamos conta do acontecido a catro militantes da nosa organización por realizar actividade política na cidade da Coruña. No contexto dunha nova ofensiva do Estado Sionista de Israel contra a poboación palestina, compañeiras de Isca! e o MGS da Coruña realizamos un mural en solidariedade coa súa loita e a súa resistencia. Días despois, o Goberno Municipal decide iniciar un expediente sancionador impoñendo unha multa que ascende a 704€.

A persecución que na Galiza se vén realizando nos últimos anos contra os movementos de resposta social é evidente e palpábel con multitude de activistas sancionadas ou mesmo enxuizadas por denunciar publicamente diferentes situacións inxustas a nivel local ou global. O que chama poderosamente a atención é que a actuación dun goberno municipal -en mans da Marea Atlántica- que se autoproclama rebelde, insumiso e transformador sexa moi semellante á que tivo o goberno do Partido Popular da Coruña cando, na pasada lexislatura, sancionou con 600€ a tres compañeiros por realizar un mural en defensa dun Futuro Digno na Nosa Terra.

É por isto que desde Isca! da Coruña organizamos unha festa solidaria o vindeiro sábado día 16 de abril no Bar Faluya (Rúa Orzán nº 75). A partir das 20:00 horas contaremos cunha pequena foliada, chourizo ao pan, comida vegana e máis! Por volta das 22:00 horas contaremos coa actuación de VolkGZ co seu rap en galego.

Non faltes!