A Liga considera inadmisibel a suba de taxas proposta polo Reitor da USC

A seguir reproducimos o comunicado difundido pola Liga ante a suba das taxas anunciada polo reitor da USC, Casares Long:

Dende a Liga Estudantil Galega facemos unha valoración moi negativa das palabras do Reitor Casares Long, que afirmou onte que é “inevitable” abordar unha suba de taxas na Universidade de Santiago de Compostela. Consideramos que supón, unha vez máis, un ataque á Universidade pública e un atranco para o estudantado, especialmente aquel de baixos ingresos, no seu acceso á Educación Superior.

O Reitor, pola contra, non tivo un posicionamento tan firme ante a situación do financiamento estrutural que outorga a Xunta de Galiza: nos últimos tres anos (os do goberno do PP na Xunta), os orzamentos para o SUG descenderon un total do 19%, mentres que a súa distribución vén determinada por criterios competitivos entre as universidades galegas cunha nula estratexia para a educación superior en clave de País.

É evidente o escaso interese dende as institucións públicas deste país en manter un servizo de calidade na universidade, buscando a súa progresiva privatización a través do afogamento económico e a elitización do ensino superior mediante medidas como a suba das taxas, descenso de becas e diminución de prestación de servizos. Pola contra, é necesario plantexar unha alternativa onde sexan os poderes públicos quenes financien o sistema universitario baixo parámetros semellantes aos países da nosa contorna. Se a media da UE-15 en gasto de Universidades rolda o 1,3% do PIB, en Galiza non chegamos ao 0,75%, tendo en conta ademáis un déficit histórico no Ensino Superior.

O modelo educativo ten que camiñar cara a redistribución social, suprimindo as diferencias económicas e democratizando o acceso á Universidade e a súa xestión.