Á rúa contra o feminicidio. Participa das convocatorias!

QhsorkeFSv2WFulvUn ano máis chega o 25 de novembro, día Internacional pola Eliminación da Violencia contra a Muller, e con el a lamentábel necesidade de ter que chamar a atención sobre o feminicidio. A morte de mulleres a mans de homes como expresión última de dominación patriarcal tense convertido nunha situación tan habitual que xa case nin escandaliza, mais é responsabilidade nosa, das feministas, que ningunha morte sexa esquecida e que as mulleres que sofren o terrorismo machista non sexan máis unha estatística, nin volten ocupar páxinas de sucesos dos xornais, lugar que tanto custou ao movemento feminista que abandonaran.

O 25 de novembro alzamos a voz contra a violencia machista. Digámolo claro: contra o terrorismo patriarcal. Pero non abonda. A violencia de xénero vai alén dos golpes, das palizas e os ollos morados. Vai alén das humillacións, dos insultos e as vexacións. Violencia de xénero son tamén as agresións sexuais de quen pensan que manter unha relación afectiva cunha muller lles outorga dereitos sobre o corpo e o desexo dela. Violencia de xénero é a concepción da nosa sexualidade como un instrumento para a reproducción, sobre o que todo o mundo pode opinar e decidir, agás nós. Violencia de xénero é o ideal estético que destrúe as vidas de milleiros de rapazas novas, facéndolles crer que a súa felicidade depende da súa apariencia exterior. É violencia tamén cando nos obrigan a nos sentir incluidas ao falar de “todos”, de “compañeiros”, de “alumnos”, de “traballadores”. Existimos, e quen nos soterra baixo a excusa da linguaxe tamén exerce violencia sobre nós. Violencia de xénero, terrorismo machista é o emprego da violación como arma de guerra en todos os conflitos bélicos do mundo, son os feminicidios ocultos mediáticamente, son as leis que prohíben o noso dereito a dispor da nosa maternidade, son as normas sociais que só nos queren sumisas.

Por iso a loita contra a violencia machista non pode ficar nunha data. É moito o camiño que fica por andar, pero maior é a forza que nos impulsa a seguir loitando, este 25 de novembro e os restantes días que virán, para construir as armas que nos permitan derrubar o sistema patriarcal e vivir todas en liberdade.

Convocatorias:

  • A Coruña, 20:00 horas no Obelisco.
  • Cee, 19:30 horas na Praza 8 de Marzo.
  • Compostela, 20:30 horas na Praza 8 de Marzo.
  • Narón, 20:00 horas na Praza da Gándara.
  • Ourense, 20:30 horas na Praza do ferro.
  • Pontevedra, 20:00 horas na Praza da Peregrina.
  • Vigo, 20:00 horas na Farola de Urzáiz.

Partíllao!

En Facebook
En Twitter
En Pinterest
Polo WhatsApp
Ou polo Telegram
Email

Deixa un comentario