[Aborto] Vencemos unha batalla mais a loita segue

O proxecto de reforma da Lei do Aborto que tiña preparada o goberno español supuña un retroceso sen precedentes no recoñecemento dos dereitos sexuais e reprodutivos das mulleres, un ataque á nosa liberdade e á nosa capacidade de autodeterminación en relación á sexualidade e a libre escolla da maternidade.

Ese proxecto, teiman en nos dicir, tiña como principal obxectivo a defensa da vida do feto, cuestionando incluso a posibilidade de interromper o embarazo por malformacións, infravalorando os riscos reais para a saúde da muller, que terían que ser acreditados perante un tribunal médico. Lexitimaba a obxección de conciencia das facultativas ou obrigaba a contar cun consentimento familiar en caso de ser menor de idade. Unha lei que nos retrotraía a antes da normativa de 1985, sendo infinitamente máis reaccionaria que a aprobada no 2010 que, se ben tiña moitas carencias aínda, supuña un paso adiante na materia.

Definitivamente e após moitos meses de mobilizacións e alerta feminista, após accións comarcais e nacionais, após iniciativas sociais e institucionais e dunha grande socialización do problema, o goberno español do Partido Popular decidiu dar marcha atrás e retirar esta reforma da súa axenda política agás un dos seus puntos, a necesidade do consentimento familiar para interromper voluntariamente o embarazo en caso de ter entre 16 e 18 anos. Unha vitoria case completa da resposta social e do movemento feminista na auténtica marea negra que para o noso pobo e o conxunto das clases populares se ter convertido o goberno español, quen só ten por obxectivo continuar coa destrución dos dereitos sociais e laborais con proxectos como a reforma da lei de mutuas, a reforma fiscal ou a lei de seguridade cidadá.

Parabenizámonos polo paso atrás non voluntario mais forzado pola presión popular. Porén, desde a necesaria e constante alerta feminista non concedemos ao inimigo nin un ápice de descanso e animamos a seguir loitando polo dereito que temos as mulleres a decidilo todo sobre os nosos corpos e as nosas vidas. Quedan moitos dereitos roubados por recuperar e moitos outros por conquistar, por iso, a mobilización non debe parar e desde Isca! chamamos á mocidade a saír á rúa o vindeiro domingo 28 ás 12:00 horas os actos da Plataforma Galega pola Defensa do Dereito ao Aborto:

• Compostela: concentración na Praza de Praterías
• Ferrol: pasarrúas desde o Cantón até a Praza do Inferniño
• A Coruña: concentración no Campo da Leña
• Vigo: concentración no palco da Alameda de Bouzas (11:30h)
• (Por confirmar)

Nin igrexa nin goberno
no meu corpo mando eu!