Acto na Coruña: reformas do capital e alternativas

 O capitalismo é un sistema incapaz de proporcionar á xente moza unha alternativa distinta á explotación e á miseria. Inmersos nunha nova e fonda crise do capitalismo na súa fase neoliberal os poderes económicos que nos gobernan xa non se preocupan en disfrazar a súa voracidade lexislando medidas terroríficas contra a clase traballadora. Reforma laboral, reforma das pensións, reforma da negociación colectiva, recuperación da figura do aprendiz, posibilidade de reenganchar contratos temporais, contrato de prácticas, etc. A explotación, a miseria e os despedimentos conxúnganse á perfección debuxando o futuro que nos agarda ás mozas e mozos deste País mentres que nos gobernen os mesmos que nos meteron nesta crise.

Desde a Asemblea de Zona de Isca! da Coruña organizamos un acto de denuncia das políticas que o PSOE e o PP estiveron e están a levar a cabo en materia laboral desde a Xunta de Galiza e desde o Estado, analizaremos tamén como combatilas e as alternativas que existen. Intervirá Ramiro Oubiña, membro da Executiva Confederal da Confederación Intersindical Galega (CIG).

Terá lugar o vindeiro venres 13 de xaneiro nas 20:30 no local da Asociación Cultural Alexandre Bóveda sito na rúa Olmos 16-18, 1º andar.