Ante un estado irreformável, independência é liberdade!

 

Há uns dias, o regime espanhol quitou-se a careta de estado democrático, amosando a sua verdadeira faciana que as revolucionárias denunciaram há muito tempo: a do autoritarismo e a repressom. Numerosos altos cargos da Generalitat de Catalunya eram detidos polo único feito de respeitar a vontade popular e cumprir o seu programa com o que concorreram às eleiçons. As alcaldias dos municípios que vam participar no referendo sofrem perseguiçom judicial por facilitar os direitos cívicos e democráticos.

O direito de autodeterminaçom foi reconhecido pola ONU e outras instituiçons internacionais. Porém, esse direito nom existe para os povos oprimidos no cárcere de povos que é Espanha. Baixo o pretexto de cumprir a sua sacrossanta Constitución, o poder impóm, governe o partido que governe desde Madrid, a sua concepçom do estado aos povos que o integram, sem oportunidade nengumha de decidir que sistema politico querem ter. Assim, com o regime borbónico chamado com frequência regime do 78, todo quedou atado y bien atado, como pretendia Franco ao nomear ao seu sucessor.

Nom surpreende, pois, que o governo espanhol empregue unicamente a via judicial contra o procés. Mentres a amnistia fiscal às grandes fortunas tardou 5 anos em ser declarada ilegal, o Tribunal Constitucional, um dos grandes baluartes do regime do 78, tardou menos de 24 horas em suspender as leis democraticamente sancionadas no Parlament. A deriva repressiva dos últimos dias demostra que a dicotomia nom é já só dependência ou independência, senom também ditadura ou democracia. Malia o enorme movimento popular dos últimos anos no Principat de Catalunya, o estado nom sentou a negociar. Um simples paralelismo entre o caso catalám e o escocés, no que a Gram Bretanha aceitou um referendo sobre a independência escocesa, atestiga o carácter irreformável do Estado Espanhol.

Este processo também serviu para que a esquerda espanhola quedasse retratada: no canto de respeitar e fazer cumprir os direitos nacionais de Catalunha, no seu afam de intentar contentar a todo o mundo, mantem-se numha equidistância imprópria de forças que se autodenominam rupturistas.

Por último, também denunciamos a manipulaçom dos meios de comunicaçom espanhóis, que nom tinham reparos em qualificar de ditador Nicolás Maduro, malia ter convocado eleiçons, mas justificam que o Estado Espanhol se incaute de papeletas, urnas ou cartazes eleitorais para tratar de botar abaixo o referendo.

É hora de organizar-se para pular por umha sociedade justa! Chamamos-te a ti, moço ou moça galega, a organizar-te connosco por umha Galiza independente e socialista!

 

Partíllao!

Share on facebook
En Facebook
Share on twitter
En Twitter
Share on pinterest
En Pinterest
Share on whatsapp
Polo WhatsApp
Share on telegram
Ou polo Telegram
Share on email
Email

Deixa un comentario