Assinamos o manifesto “Viva o Dia da Pátria Galega!”
- Actualidade política
A seguir reproduzimos o manifesto que assinamos junto a outras onze organizaçons políticas e sociais de nosso país, às portas dum novo 25 de julho à volta do qual se estám a der cada vez mais passos no caminho de reunir forças pola libertaçom nacional e social da nossa naçom:
Viva o Dia da Pátria Galega!
Galiza é umha velha naçom oprimida polo Estado espanhol. Na carência de soberania radicam a imensa maioria dos graves problemas que padecemos como povo e como naçom.
O atraso secular que arrastamos deriva da exploraçom económica, da dominaçom política e da assimilaçom cultural a que a Galiza se vê submetida por Espanha, um Estado que conculca os mais elementares direitos coletivos dumha naçom como a Galiza, um Estado que impossibilita o exercício do direito de autodeterminaçom recolhido em todos os tratados e protocolos internacionais.
A crise económica, política, institucional do regime espanhol tem acelerado a recentralizaçom e a implementaçom de um conjunto de medidas tendentes a destruir a nossa identidade nacional e a reforçar os mecanismos de dependência que visam inviabilizar-nos economicamente.
É evidente que a situaçom económica e social do povo galego seria outra se possuíssemos um sistema financeiro próprio e se participássemos diretamente e sem intermediários desnecessários nas políticas agrárias, pesqueiras ou nas que estám a dar cabo da nossa indústria naval. O povo galego está a padecer as conseqüências devastadoras da ausência de soberania no quadro dumha crise do sistema capitalista e da crise dumha UE radicalmente neoliberal, dominada polos mercados financeiros. Numha tentativa de frear a vontade soberanista e democrática dos povos, suportamos um dramático processo de involuçom de direitos e liberdades.
Perante esta adversa situaçom, um setor destacado deste povo temos a firme determinaçom de exercer como galegas e galegos, de recuperar os direitos nacionais perdidos, de caminharmos mediante a ruptura democrática face um processo constituinte que culmine na proclamaçom da República da Galiza, pois é a única forma de evitar tanto desemprego, empobrecimento, emigraçom, precarizaçom laboral, cortes de liberdades e direitos…
Por todo isto, perante o Dia da Pátria de 2013, as forças políticas, sindicais e sociais abaixo assinadas manifestamos:
1º- A nossa satisfaçom pola constituiçom da iniciativa suprapartidária, plural e unitária Galiza pola Soberania.
2º- A nossa satifaçom polo clima e atmosfera de diálogo e interlocuçom, polos passos dados na unidade de açom entre as diversas forças patrióticas políticas e sociais.
E apelamos:
1º- O nosso povo para secundar ativamente todas aquelas iniciativas patrióticas promovidas nos vindouros dias ao longo da Naçom que reclamem a soberania e a independência nacional da Galiza.
2º- A pendurar nas varandas, janelas, fachadas de casas e vivendas, o emblema nacional da nossa única Pátria, a bandeira da Galiza.
– Agir
– Bloque Nacionalista Galego
– Briga
– Causa Galiza
– Central Obreira Galega
– Comités
– Confederación Intersindical Galega
– Federación Rural Galega
– Galiza Nova
– Isca!
– Liga Estudantil Galega
– Nós-Unidade Popular
Galiza, 21 de julho de 2013
