Campaña contra o fascismo nas festas do San Froilan

Desde a Asemblea de Zona de Lugo de Isca! queremos amosar o noso rexeitamento coa programación festiva do San Froilán 2013 deseñada polo goberno municipal da cidade. As primeiras festas que organiza o PSOE nun goberno en minoría neste mandato perden, polas actuacións anunciadas, o contido de festa galega e popular que caracterizou as patronais lucenses xa desde o século XVII.

A perda de peso da música galega, de moitos grupos de diferentes tendencias musicais que fan música de grande calidade con letras en galego, así como a exclusión da organización de eventos por parte do tecido asociativo cultural e dos grupos musicais da localidade e da comarca, caracterizan unhas festas que van estar guiadas por estereotipos culturais e de lecer foráneos; como xa denunciou no seu día o grupo municipal do BNG na localidade.

Xa é coñecido de vello o desleixo con que os gobernos do PSOE tratan á lingua e á cultura galegas e, máis concretamente, á cultura tradicional e de raíz popular; así como todos os símbolos identitarios do noso País. Mais desta volta, as festas chegan a un grado máximo de expresión dunha premeditada imposición dos patróns culturais españois: a actuación da “folclórica” Charo Reina, que alén do que supón de reprodución dun paradigma cultural rancio, españolista e alleo á cultura galega; é unha significada militante da causa fascista, tendo ensalzado en diversas ocasións a violencia e a persecución contra as vítimas da ditadura franquista e contra a militancia da esquerda e nacionalismo xusto despois da morte do ditador; momentos nos que era dirixente de Fuerza Nueva, como se demostra no documentario –censurado no seu día- Después de… Atado y bien atado (1983), dirixido por Cecilia Bartolomé.

As súas declaracións sobre o fascismo e a violencia contra a militancia antifranquista déixanos citas como as seguintes:

“si defender la unidad de la Patria es ser fascista, yo lo soy”

“la violencia es legítima cuando se ofende a Dios y a la Patria”

Ante a presenza no cartaz do San Froilán dunha persoa de destacada e fanática militancia fascista e que se adica a ensalzar prácticas xenocidas como as que tiveron lugar durante a ditadura franquista, Isca! quer denunciar publicamente a inclusión dunha persoa de tal calibre na programación e solicita do Concello que sexa retirada a súa actuación do programa de festas.

Ao mesmo tempo, queremos denunciar a actitude hipócrita do PSOE, que sendo unha organización que ten militantes asasinadas, presas, torturadas e perseguidas pola ditadura franquista; introduza nos actos do San Froilán unha actuación dunha persoa que se enorgullece da ditadura e do terrorismo de Estado que esta aplicou contra a militancia da esquerda e os movementos sociais. Unha actitude que garda relación co feito de que, a día de hoxe, as rúas de Lugo sigan levando os nomes de destacados cargos da ditadura implicados no golpe de Estado de 1936 e na represión, como Ramón Ferreiro, Ruíz de Alda, Alférez Provisional, Tenente Coronel Teijeiro, Comandante Manso ou García Morato, por poñer algúns exemplos; a pesar de que a lexislación actual obirga aos Concellos a substituír eses nomes e o tecido asociativo da localidade xa o ten solicitado.

Desde Isca! queremos chamar á mocidade a denunciar e combater o fascismo, a non permitirlle ocupar ningún espazo, nin público nin privado; e demandamos que as festas do San Froilán recuperen o seu carácter popular e galego.

Por unhas festas populares e galegas: fóra fascistas do San Froilán!