[Campaña nacional] Encontros formativos en Bueu e Vigo
- Actos
Como vemos a Galiza é hoxe moito máis pobre e vella que antes de o PP tomar o poder. Ás escandalosas cifras de paro súmase un premeditado ataque aos dereitos laborais, que en forma de reforma laboral e recortes de corte neoliberal, precariza o emprego e limita as axudas sociais. Aínda máis, pois acentúa o secular fenómeno emigratorio do país.
Hai unhas semanas lanzamos unha campaña nacional baixo o lema “rachar o pacto social, loitar polo noso futuro” para denunciar a situación de éxodo xuvenil e aumento do desemprego que vivimos. Esta campaña, que se desenvolverá até o 1º de Maio, acredita na loita anticapitalista e popular como a única capaz de derrubar un sistema inxusto. Para achegar claves que nos axuden a comprender a realidade na que vivimos estamos a organizar unha serie de actos formativos en diferentes comarcas do noso país, desta volta en Vigo e Bueu.
Vigo
Falaremos da organización da mocidade na crise do capitalismo con Marcos Cadórnica, sindicalista da Confederación Intersindical Galega. O acto terá lugar no local do BNG (Rúa Celso Emilio Ferreiro) o vindeiro 29 de abril a partir das 20:30 horas.
Bueu
Falaremos da crise capitalista na mocidade, futuro e perspectivas con Anxo Noceda, sindicalista da Confederación Intersindical Galega. O acto terá lugar na Asociación para o debate Ricardo Gómez Buceta (Rúa Afonso Rodríguez Castelao, 40) o vindeiro 30 de abril a partir das 20:00 horas.
Queremos soberanía para decidir o noso futuro e xerir os nosos recursos, póndoos ao servizo das clases populares e demostrando que existe unha alternativa á desigualdade social: o socialismo. Desde o espazo ideolóxico soberanista do que facemos parte son moitas as loitas políticas, sindicais, estudantís e xuvenís na que son precisas máis mans para tecer esas alternativas. Organización, mobilización e rebelión!
Non faltes!
.
>> [Campaña nacional] Rachar co pacto social, loitar polo noso futuro
