Charla-coloquio sobre a folga xeral na Coruña

Nun ano de goberno estatal do Partido Popular vimos de sumar un millon máis de parados e paradas, unha subida do IVE e o IRPF, reducións das prestacións de desemprego, das prestacións sanitarias, da calidade do ensino cunha subida das taxas e diminución das bolsas, o roubo continuado do salario das e dos empregados públicos, etc. Están a destruír os nosos dereitos que tanto tempo levou conquistar e na nosa man está tomar as rúas para responder de xeito contudente e definitivo a estas políticas ditadas polo capital transnacional e dirixidas a expoliar os recursos das clases populares.

Desde Isca! estamos a realizar un labor de concienciación entre a sociedade en xeral e na mocidade en particular sobre a importancia de tomar masivamente as rúas o vindeiro 14 de novembro e por isto organizamos (conxuntamente co MGS) o vindeiro venres 9 de novembro no local da Asociación de Veciños de Montealto (Campo de Marte s/n) un coloquio no que contaremos coa presenza de Ramiro Oubiña, membro da Executiva Confederal da CIG, onde abordaremos as razóns e a necesidade desta convocatoria. Proxectaremos tamén o documental da CIG “A crise, o sistema e a soberanía”.