Charla da CIG-Mocidade: respostas da mocidade á crise

O xoves 11 de decembro ás 20 no Salón de Actos do local sindical da CIG de Vigo (R/ Gregorio Espiño 47) a CIG Mocidade organiza un encontro dirixido aos mozos e mozas traballadoras desta comarca. En primeiro lugar haberá unha charla e posterior debate sobre a crise social e económica e as súas consecuencias para a mocidade traballadora.

Nesta palestra participarán varios mozos e mozas de distintos sectores como o naval ou o telemárketing, cunha alta presenza de xente nova na comarca de Vigo nestes empregos. Estes mozos e mozas contarán a súa experiencia e as consecuencias que está a ter nos seus distintos sectores a cuestión da crise económica.Antolín Alcántara, secretario confederal da CIG de Saúde Laboral e Negociación Colectiva, intervirá tamén neste encontro para analizar a situación actual no mundo do traballo e apresentar as propostas sindicais da CIG para facer fronte á crise.

Retomar o traballo da CIG-Mocidade

Desde a CIG Mocidade anuncian tamén que “queriamos aproveitar esta xornada para encontrarnos e retomar o traballo da CIG Mocidade”, polo que realizan un chamamento á participación “xa que todos os mozos e mozas temos que organizarnos para combater a lacra da precariedade laboral, e máis neste momento de crise, na que milleiros de persoas están quedando na rúa sen traballo, e onde cada vez é máis difícil atopar un emprego no que se respecten os nosos dereitos laborais e sociais”.

orixinal tirado do portal da CIG

 

Partíllao!

En Facebook
En Twitter
En Pinterest
Polo WhatsApp
Ou polo Telegram
Email

Deixa un comentario