[Compostela] 200€ de sanción por isto?

Máis unha vez a represión golpea a mocidade rebelde do país. A noite do 15 de outubro a policía española sorprendía a un grupo de militantes de Isca! mentres levaban a cabo propaganda axitativa, procedendo a súa identificación e a conseguinte sanción económica: 200€ por dúas pintadas de pequenas dimensións feitas cunha plantilla.

As pintadas en cuestión eran o logo da nosa organización e un pequeno texto no que se podía ler “loitando.org“; ambas pintadas facianse con plantilla para que o resultado final fora atractivo e non tivera un impacto visual que crease rexeitamento. Chama a atención o importe das multas, bastante máis elevadas que as doutras faltas moito máis graves e que non teñen unha carga económica tan esaxerada, ou que incluso, en moitas ocasións, nin sequera son sancionadas. Podemos citar casos de pelexas, insultos e abusos que até poderían ser considerados delitos de odio, por ter compoñentes raciais ou ir contra mulleres ou persoas LGTBI+. Tristemente podemos observar case todas as noites como estes delitos fican impunes, mentres a hora de reprimir un acto político empréganse efectivos e medios até límites esaxerados, como se pode comprobar en múltiples ocasións.

Por este motivo, queremos deixar claro o fin político e o afán de escarnio das actuacións que realiza a policía, reprimindo moi frecuentemente aos colectivos xuvenís que nos posicionamos politicamente de forma clara. Saben que unha multa é unha forma sinxela e efectiva de desmobilizar a mocidade nun contexto de paro e crise social no que moitas persoas teñen problemas para asumir unha sanción económica. Polo que podemos constatar o seu aumento nos últimos anos.

Hai unha cousa que si temos clara, a represión non nós parará!