Comunicado de Isca! perante os sucesos do domingo 8-F

Perante os factos das últimas horas, e en relación coa nosa participación na resposta á entidade españolista “Galicia Bilingüe” e a posterior detención e posta en liberdade con cargos de 3 dos nosos militantes , Isca quer expresar:

1) “Galicia Bilingüe”, entidade que organizou a marcha do Domingo 8 de Febreiro, pretende a derogación da Lei de Normalización Lingüística, a segregación dos nenos e nenas galegas nas escolas por cuestión de idioma, a limitación drástica do uso do galego por parte da administración e a diminución da presenza pública do noso idioma. “Galicia Bilingüe” propón, por tanto, a limitación dos exíguos dereitos dos galego-falantes nun contexto real de discriminación do galego a todos os niveis, pretendendo retrotraer a lexislación á etapa franquista e mesmo indo mais aló. A partir da aplicación de modelos lingüísticos procedentes doutras coordenadas que nada teñen a ver coa nosa realidade, Galicia Bilingüe propón a monstruosa posibilidade da división etnicista do noso país, Galiza.

2) A partir deste argumentario, Isca! considera unha provocación a marcha organizada por Galicia Biligüe o 8-F en Compostela, evidenciada no idéntico percorrido ás manifestacións tradicionais do nacionalismo galego, a chegada de 12 autobuses desde Madrid (un deles fletado por Falange) , o paraquedismo de organizacións españolistas e líderes ultras como Rosa Díez ou Albert Rivera que se teñen manifestado en contra da normalización dos idiomas minorizados como o galego. Tamén cabe reseñar a lamentábel participación de certos dirixentes do PP como Corina Porro (ex-alcaldesa de Vigo), que cegados pola súa xenofobia agreden conscientemente os dereitos de moitos dos seus votante galegófonos.

3) Isca! participou nos lexítimos actos de protesto que, amparados no dereito á crítica e á liberdade de expresión contestaron o discurso de quen pretende anular os nosos dereitos e excluír da vida pública o noso idioma, lexitimando con esas actitudes a discriminación idiomática que padecemos todos os días, e que sufriron e seguen a sofrer moitos galegos e galegas.

4) A nosa organización concluiu que a reposta ridiculizante ía ser a mais consecuente para denunciar as actitudes de permanente provocación de “Galicia Bilingüe” e demais colectivos supremacistas, pois poría en evidencia con maior rotundidade o verdadeiro discurso galefófobo que pretenden agochar de cara aos medios de comunicación. Así pois, varios e varias militantes de Isca! saian disfrazados con disfraces de vaca á rúa, un animal no cal simbolizaba Castelao a loita pola liberación nacional. Portaban cartaces onde se podía ler “el gallego es para hablar con las vacas”, nunha acción irónica que recuperaba unha coñecida expresión xenófoba utilizada desde o españolismo durante anos.

5) Pesia o carácter eminentemente pacífico e irónico da nosa acción, que se limitou ao paseo por zonas colidantes ao percorrido da manifestación mostrando os cartaces, varios antidisturbios procedían á retención e identificación en varias ocasións dos militantes disfrazados, chegando a inmobilizalos e mesmo agredilos inxustificadamente en varias ocasións sen que deran razóns de nengún tipo, como se pode evidenciar nun video que gravamos e está disponíbel na nosa páxina-web. Ao final da manifestación, nas inmediacións da Praza da Quintana, e cando 3 dos nosos militantes deixaran o disfraz, e sen mediar motivo, varias persoas abalanzábanse contra eles, sendo logo detidos pola policía e levados a comisaría, onde pasaron a noite, acusados de “tentar impedir o dereito á manifestación”. Ao día seguinte, foron postos en liberdade con cargos.

6 ) Duante a súa estancia nas dependencias policiais, e desde o momento en que foron levados aos calabouzos xunto co resto de compañeiros detidos, foron tratados por parte dos policías de xeito despectivo e degradante: varios deles foron obrigados a espirse antes de entraren nas celas, nas que, ademais de ter a luz prendida en todo momento e non seren alimentados até a noite, nalgún caso tiveron que dormir no chan, noutros fóronlles retiradas as mantas para cubrise do frío, e mesmo algúns foron obrigados a permanecer em pésimas condicións hixiénicas rodeados de todo tipo de residuos.

7 ) De Isca! queremos denunciar a represión xeralizada e o estado de sitio ao que someteron Compostela os mais de 400 efectivos policiais e anti-disturbios despregados por toda a cidade durante o Domingo, cargando indiscriminadamente contra manifestantes, agredindo e lesionando. O simple feito de falar galego ou ter unha estética determinada provocaban a identificación policial imediata. Neste contexto, queremos solidarizarnos con todas e todos os detidos que de diversas maneiras contestaron á provocación de “Galicia Bilingüe”, portando cartaces, despregando faixas ou manifestándose paralelamente ao percorrido. O domingo 8, centos de militantes independentistas, activistas do ridiculismo e defensores e defensoras do galego sairon a demostrar que a dignidade do pobo galego non é negociábel, e que por mais que a policia e certos medios se adiquen a criminalizar , deter e reprimir aos defensores da língua, a forza da razón está con nós, e seguiremos a defender o noso idioma e denunciar a imposición lingüística onde quer que faga falta.

8 ) De Isca! agradecemos as numerosas mostras de apoio recibidas ante a detención de tres dos nosos militantes , contando aquí mostras de solidariedade a título individual así como de distintas organizacións e movementos sociais do país, xa for mediante comunicado ou difundindo o vídeo da nosa acción, ademais do apoios internacionais que nos chegaron.

9 ) Isca! non quer que a resposta ás provocacións de grupos ultra-españolistas nos desligue da cuestión fundamental: denunciar diariamente a vulneración dos nosos dereitos, argumentar a necesidade da normalización da língua, arroupar os e as discriminadas por falar no seu idioma no centro de traballo, na escola, no centro de saúde ou na rúa e , en fin, traballar arreo para que non logren silenciar o fundamento do noso protesto.

Temos que lograr que a problemática da língua logre mobilizar o noso pobo. Non lograron rematar co idioma no pasado, e tampouco o van lograr agora, mais é tarefa dos e das nacionalistas o atoparmos fórmulas acaidas para a concienciación social perante a gravidade do problema. Temos que ser quen de quitarlle a carauta aos falsos bilingües, expresando dunha maneira pedagóxica e clara a emerxencia do galego. Xa vimos que eles precisaron traer autobuses de Madrid para nen tan sequer mediar a praza da Quintana. O noso obxectivo debe consistir en lograr que a maioría social do noso pobo comprenda que “Galicia Bilingüe” redita a pior versión do supremacismo españolista que olla o galego como mostra “tribal” e “folclórica”, tolerábel na medida en que non poña en perigo a homoxeneidade que pretenden para o seu proxecto nacional español.

Para os mozos e mozas galegas, a loita referencial contra o fascismo que desenvolveron os nosos pais e nais senta un precedente de dignidade e de loita. Estes grupos pretenden reditar o pior fanatismo etnicida reformulando o discurso, e por iso temos que saber combatelos analisando consecuentemente a súa mutación en chave neo-liberal. A súa loita é pola segregación , a nosa pola dignidade. Gañaremos se sabemos actuar unidos, coordenadamente, priorizando en cada momento a cuestión esencial.

Galiza non se rende!

Defender a Língua non é delito.