Comunicado sobre a Operación Jaro
- Actualidade política
Facemos noso o comunicado do Movemento Galego ao Socialismo sobre o proceso coñecido como Operación Jaro, que reproducimos a continuación:
O MGS rexeita o proceso coñecido como Operación Jaro, que supuxo a suspensión de actividades da organización política Causa Galiza durante dous anos, e o inicio dun proceso xudicial contra nove militantes galegos, desenvolto na Audiencia Nacional española. Neste sentido, transmitimos a nosa solidariedade á organización e ás súas militantes directamente afectadas e reclamamos o seu dereito a militar e actuar política e socialmente nas claves que achen máis oportunas.
Entendemos que esta operación é indisociábel da evolución política do Estado Español e do capitalismo contemporáneo e enmarcamos estes acontecementos nun proceso máis amplo e extendido no tempo, que reforza as estruturas represivas e securitarias do Estado á vez que reduce as súas funcións sociais, frecuentemente coa excusa da persecución do terrorismo. Ademais, reafirma as teses sobre o carácter fraudulento e limitado da democracia resultante da Transición española. Esta caracterización fica ratificada pola continuidade da Audiencia Nacional como tribunal de excepción, a ausencia de liberdades democráticas plenas e a constante vixilancia e intervención policial das comunicacións e actividades públicas e privadas de diversas organizacións políticas, sociais e sindicais, nomeadamente a daquelas que reclaman a liberdade dos pobos, principal vector de ruptura e transformación social no Estado Español.
O noso país precisa un novo marco político e xurídico, un Estado propio e popular que garanta os dereitos e liberdades dos que hoxe carecemos. Mais tamén precisa, a curto prazo, de reforzar o proxecto global do movemento soberanista. Do contrario, estaremos expostos a operacións represivas de tanta ou maior intensidade como a que hoxe denunciamos.
Por todo isto, desde o Movemento Galego ao Socialismo, como máis unha organización pola independencia do noso país, animamos a participar na manifestación que partirá este día 24, ás 12h00, desde a Alameda de Compostela.
