Continúa a represión contra a mocidade vasca

Actualidade política

Isca quere solidarizarse coa mocidade vasca ante a nova vaga represiva que vén de sufrir coa detención de polo menos catorce persoas. Coa acusación de “tentar recompor a estrutura de Segi”, o Estado español e as súas forzas represivas asestan un novo golpe non só ao dereito do pobo vasco a autoorganizarse no camiño da autodeterminación e a independencia nacional, tamén ás expectativas de paz e resolución por vías democráticas do conflito vasco que se abriron coa declaración de tregua por parte de ETA e coas resolucións e declaracións públicas nas que a esquerda abertzale se reafirma nos medios pacíficos e democráticos para acadar os seus obxectivos estratéxicos. Entendemos que estas detencións non son casuais, e hai que encadralas na estratexia dun Estado sometido a fortes tensións desde dentro e fóra do Goberno para inviabilizar posíbeis negociacións políticas, manter o conflito na Euskal Herria e alimentar o discurso da derrota policial como única saída posíbel, a única de interese para as clases dominantes españolas. Isca amosa, pois, o seu compromiso internacionalista co pobo vasco e anima a mocidade organizada arredor de Segi e de calquera siglas da que o movemento abertzale se dote a continuar a traballar por un país libre e socialista, a pesar da represión e da violencia do Estado.