Contra a constitución española, pola República Galega

O Réxime do 78 segue plenamente vixente 40 anos despois, retroalimentándose cada día -como puidemos ver o pasado domingo nas eleccións andaluzas- da dereita neofranquista, da nova dereita liberal e da vella -pero tamén da nova- socialdemocracia españolista. Desde Isca!, na liña histórica do movemento nacional-popular galego dende os anos 70, posicionámonos en contra da Constitución Española.

Corenta anos despois da aprobación da Constitución, o Reino de España séguenos condenando a un réxime capitalista baseado na falta de liberdade para a clase traballadora e os diferentes pobos do estado, con nulos valores democráticos, militarizado, monárquico, que nega a existencia das nacións oprimidas por este cárcere constitucional e que garante un sistema económico inxusto para as maiorías sociais. A mocidade galega continúa a sufrir unha orde socioeconómica ideada e dirixida por e para as elites da burguesía española, seguidoras e continuadoras do réxime franquista. A Constitución utilízase como base xurídica e ideolóxica para lexitimar o Réxime do 78. De feito, a mesma está totalmente ideada para crear un ambiente seguro para os partidos españolistas e criminalizar os diferentes movementos independentistas e populares. Ademais, dita constitución crea unha orde social inalterable e conservadora onde os cambios e transformacións democráticos e republicanos son inviables como vimos o pasado 1 de outubro de 2017 en Catalunya.

A propaganda do réxime lémbranos, nun exercicio de manipulación histórica, a Transición española como referente democrático e de liberdade cando a única alternativa que se ofrecía ao pobo era esta Constitución ou a continuación da ditadura. Non se deron voz a outras posibilidades republicanas e que recoñecesen o dereito a autodeterminación das nacións sen estado. O Estado Español, os medios de comunicación e as elites políticas e económicas fixeron o seu papel ao longo destas décadas difundindo o espírito da Transición idealizada e reprimindo aos movementos políticos contrarios a esta.

Debemos lembrar que por moito que nos poñan a Transición como o grande exemplo de paso da ditadura a democracia, a redacción da Constitución realizouse despois de 40 anos de ditadura militar e, despois de morto Franco, seguíase a ameazar cada mínimo intento de reforma coa permanente pantasma dun novo golpe de estado como o de 1936. Durante todos estes anos existiu a ameaza da involución militar ao tempo que as forzas de ultradereita reprimían con axuda dos diferentes gobernos da transición os movementos populares, nacionalistas e independentistas.

Por iso desde a mocidade rebelde galega cremos na loita pola soberanía nacional: é preciso destruír o réxime do 78, queimar a súa constitución española e rachar coas súas normas. Este sería o primeiro paso preciso para alcanzar a liberdade do noso pobo.

Desobedezamos ás institucións, rachemos coa hexemonía da burguesía española e deslexitimemos a súa Constitución que nos nega o dereito a existir e a vivir como mocidade galega nunha terra liberada e cun futuro digno, condenándonos a emigración e a precariedade.

Rachemos co seu réxime do 78! Con España non temos futuro!

Independencia!