Contra o crime dos desafiuzamentos

Unha das consecuencias da crise económica que estamos a vivir é a situación de desprotección á que se ven sometidas cada vez máis persoas, como consecuencia do capitalismo máis salvaxe. Un dos máximos expoñentes desta situación é a perda da vivenda, acompañada dun contexto onde cada día se reducen máis os servizos públicos mentres as desigualdades sociais aumentan e sitúan ás clases populares en situacións de absoluta desesperación.

Mentres, desde o goberno español e desde a Xunta véndennos falsas receitas para superar a crise, solucións ilusorias inspiradas no mesmo paradigma capitalista que é responsábel da situación e que só fan afondar nel. Así, mentres a banca recibe miles de millóns de euros para o seu rescate, a nós envólvennos nunha débeda hipotecada co noso futuro e que xa se está a pagar coa eliminación dos dereitos que fomos conseguindo, como a sanidade ou a educación públicas. A banca segue a recibir cartos a cambio de nada e, malia ser quen orixinou o problema dos desafiuzamentos ao xerar e alimentar un mercado fraudulento arredor da vivenda, non se lles obriga a adoptaren medidas reais para resolvelo e permíteselles qe sigan executando hipotecas e deixando na rúa familias enteiras sen contemplacións.

Ademais, o aumento do paro, os recortes de salarios e pensións ou o aumento das taxas dos servizos públicos só fan empeorar a situación das clases populares, situando como vítima da crise aos que ningunha  responsabilidade temos dela. As mozas e mozos revolucionarios somos conscientes da gravidade desta situación e vivimos día a día como é practicamente imposíbel conseguir un traballo que nos permita empanciparnos e ser autosuficientes, non depender doutras persoas ou poder axudar economicamente aos nosos de o precisaren. Os gobernos do PP e do PSOE son responsábeis destas situacións e cómplices do freo das posíbeis solucións. É obvio que non funcionan nin este marco político nin este sistema e que é urxente e preciso construir alternativas que camiñen cara un modelo socialista nunha Galiza soberana.

Diante de todo disto, a clase obreira temos que organizarnos e loitar por solucións reais contra os desafiuzamentos e outras agresións. Este 28 de decembro, as plataformas locais contra os desafiuzamentos concentráronse nas principais cidades do país e desde Isca! queremos apoiar a súa denuncia da lexislación hipotecaria, a esixencia de responsabilidades políticas e penais no conxunto da banca estatal, a paralización de todos os procesos de desafiuzamento e a implementación de saídas alternativas para estas situacións.

Na cidade de Ourense, aproveitamos a xornada de loita deste 28 de decembro e o contexto do Nadal para construír a nosa propia árbore reivindicativa e denunciar simbolicamente esta situación.