Criminal ataque de Marrocos contra o povo saaráui

No dia 8 de Novembro, forças militares de Marrocos atacárom o acampamento de Gdeim Izik, perto da capital do Saara Occidental, onde mais de 20.000 saaráuis demandavam melhoras sociais e o direito a nom serem tratados como cidadaos de segunda na sua própria terra. Até o momento estám confirmadas já várias mortes, a falta de conhecermos as cifras definitivas de vítimas logo desta acçom repressiva por terra e ar com um objectivo bem claro: destruir por completo um acampamento que estava a converter-se nas últimas semanas num importante foco de denúncia da criminosa política do governo marroquino. A violência trasladou-se agora às ruas de El Aaiún, onde continua a repressom violenta contra os manifestantes que protestam contra o ataque e em favor da autodeterminaçom.

Estes feitos nom som mais mais que o último episódio dum longo historial de crimes contra o povo saaráui por parte de Marrocos, iniciado coa ocupaçom há 35 anos e que deu lugar ao exílio de grande parte da populaçom autóctone (165.000 pessoas moram a dia de hoje nos campos de refugiados em Tindouf, Argélia), à construçom do muro da vergonha e aos ataques sistemáticos contra a populaçom saaraui que ficou no seu território, submetido a ocupaçom militar.

O mantimento da ocupaçom nom seria possível de nom ser pola cumplicidade de boa parte da comunidade internacional, e particularmente polo indigno papel do governo espanhol, antiga potência ocupante que hoje é o principal valedor da política criminal de Mohamed VI.

De Isca!, manifestamos a nossa solidariedade co povo saaráui, e demandamos novamente umha soluçom justa na linha do que o Frente Polisario, legítimo representante do seu povo, reclama: o reconhecimento do direito de autodeterminaçom que abra as portas à independência nacional e ao regresso de todos os refugiados à sua terra.

Ademais, chamamos a participar nas concentraçons convocadas polo BNG para hoje, 9 de Novembro, às 20:00h nas seguintes cidades galegas:

PONTEVEDRA

Subdelegación do Goberno
Praza de España, s/n

A CORUÑA

Delegación do Goberno
Avda. da Mariña, 23

LUGO

Subdelegación do Goberno
Rúa Armanya, 10

OURENSE

Subdelegación do Goberno
Parque de San Lázaro, 1

FERROL

Concello de Ferrol
Praza de Armas, s/n

SANTIAGO DE COMPOSTELA

Praza de Cervantes

VIGO

Museo MARCO
Rúa do Príncipe, 54