Crónica do acto en defensa do monte comunal

Baixo o título “O Monte é noso”, a nosa organización realizou unha charla-coloquio sobre a problemática da construción dun macro-centro comercial en terreos comunais de Cabral (Vigo). Á intervención de Susana Blanco e Mónica Pazo, comuneiras afectadas, seguiu a de Alfredo Pereira, presidente da Organización Galega de Montes Veciñais en Man Común, que trazou un percorrido polos principios organizativos e orixes históricas desta fórmula de propiedade colectiva de orixe xermánica, propia do noso país e do norte de Portugal.

No coloquio participaron veciños comuneiros de Cabral que relataron as dificultades coas que se están a atopar para evitar a expropiación do monte comunal da parroquia, na cal se pretende instalar un macro-centro comercial coa connivencia da actual xunta reitora da comunidade de montes e do concello, gobernado polo PSOE, nun proceso cheo de abusos e irregularidades. Unha das críticas máis reiteradas polos diferentes intervintes foi a que ten a ver co propio modelo de centros comerciais que arruinan boa parte do pequeno comercio das cidades, ofertando unha cifra tan demagóxica como irreal de posíbeis postos de traballo a xerar.

Desde Isca!, ao tempo que reiteramos o noso total apoio e colaboración ás e aos comuneiros de Cabral, chamamos á veciñanza de Vigo a colaborar tamén na loita e lograr xerarmos un clima de oposición ao macro-centro comercial que comece por desvendar as mentiras que a prensa deita día tras día sobre os supostos “beneficios” que o proxecto traería para cidade. Nós témolo claro: destrución dun parque forestal, graves prexuízos para a veciñanza de Cabral, ruína do pequeno comercio en prol do grande capital transnacional e fortalecemento dunha economía de servizos fronte o emprego industrial que se está a perder a marchas forzadas na cidade de Vigo. Todo isto, nun proceso completamente caciquil no que nen sequera se informou á veciñanza das consecuencias que vai ter a construción da área comercial por parte dunha multinacional mentres se tenta aproveitar a situación de crise para a instalación dun complexo mediante fórmulas plenamente coloniais.

Apoiemos a xusta loita das e dos veciños de Porto Cabral fronte a especulación polo mantemento do monte comunal. Porque non é só por elas, mais por todos e todas nós. Eles teñen a razón da forza , nós a forza da razón!