Desobediencia e loita contra a #MarcaEspaña

En medio dunha nova ofensiva de propaganda españolista coa excusa do mundial e da sucesión monárquica, as organizacións revolucionarias dos pobos sometidos polo estado español erguemos novamente a nosa voz para denunciar que o proxecto político encarnado polo seu réxime só supón para nós miseria, desemprego, precariedade, machismo e represión. Esa é a verdadeira cara desa “Marca España” que simboliza todo aquelo contra o que nos rebelamos e loitamos.

A seguir reproducimos o video da acción de denuncia levada a cabo coordenadamente en diversos povos contra un dos principais símbolos do réxime e da súa #MarcaEspaña, o Toro de Osborne.

Somos o voso pior pesadelo!

A continuación podes ler o manifesto da acción:

Desobediencia e loita contra a #MarcaEspaña 

As bases sobre as que se asenta a #MarcaEspaña son as mesmas sobre as que se asentaba o coliseo romano “Pan e Circo”. Esta marca non é máis que unha ilusión, e máis cando vemos que cada vez hai menos pan para a maioría e peor circo. Un circo baseado no elitismo, cada vez máis ferinte, dadas as desorbitadas primas que cobran os deportistas ou os tertulianos da caverna mediática. Nestes tempos onde a Selección Española pretende representar o Estado español, non poderían facelo de mellor maneira: cobrando desorbitados soldos e primas, sobre un campo de xogo regado de cadaleitos das clases populares, no que se poderá coñecer como o Mundial da vergoña e a resistencia popular. E cando o pan está rancio e o circo cheira a sangue só queda unha vía: o autoritarismo, negando o dereito a decidir do pobo e dos pobos: o dereito a decidilo todo de forma libre.

Nós, as organizacións xuvenís independentistas, socialistas e feministas dos pobos oprimidos polo Estado español, aparecemos hoxe para sinalar as bases nas que se asenta o proxecto da Marca España: violencia, manipulación e opresión.

A verdadeira #MarcaEspaña non é máis que a imposición que exerceron sobre os pobos, as clases populares e os corpos: sometemento e máis sometemento. O Estado español non só preserva, senón que reforza a esencia fascista e opresora que supostamente morrera na súa transición, ou máis ben transacción.

Así, hoxe, as mozas dos pobos oprimidos baixo o símbolo da Marca España sufrimos con especial virulencia o desemprego estrutural, a precariedade laboral, a eventualidade e a emigración, etiquetas normalizadas na prensas sistémica, mais que nós non queremos deixar de denunciar e sinalar como formas de violencia e sometemento, ás que hai que engadir o terror da dura ofensiva patriarcal que sufrimos as mulleres.

As clases populares foron desposuídas da herdanza conquistada pola loita das avoas e bisavoas, perdéndoo todo, mesmo o medo. Así, grazas á nosa loita, o medo está a cambiar de bando, e déixano claro episodios exemplares como as loitas e resistencias nos municipios e barrios dos pobos baixo xurisdición do Estado español que enchen os noticiarios a diario de mobilizacións, autoorganización e barricadas. No momento en que non temos nada que perder, ábrense as condicións para gañalo todo. A mocidade de cada un dos nosos pobos unimos forzas, coa que, grazas á imprescindíbel solidariedade internacionalista e o traballo entre todas, mesmo somos máis fortes: seremos o seu peor pesadelo!

As mozas seguiremos manténdonos firmes e actuando fronte a toda imposición da Marca España. É tempo de miseria social, mais sobre todo, é tempo de organización e de estratexia. As mozas témolo claro: desobedeceremos, abortaremos as súas leis opresivas! Coa loita sementaremos a independencia, o socialismo e o feminismo nos nosos pobos.

 Isca! – Briga – Ernai – Arran – Purna – Yesca – Jaleo!!! – Darreu – Azarug – Inekaren