Detidas 7 persoas como mínimo nos protestos contra Galicia Bilingüe

Información das 15:00 (en constante actualización)

A organización pola desaparición do galego Galicia Bilingüe contou coa colaboración da violencia policial para poder marchar sobre Compostela. As forzas de seguridade españolas puxéronse ao servizo desta entidade, identificando desde o primeiro momento a persoas que asistían por delitos de opinión, por razóns como distribuir panfletos, desplegar unha faixa ou disfrazarse para parodiar a colonización lingüística, ou mesmo aquelas que eran sinaladas polos membros do servizo de orde galegófobo. A continuación, pasaron a unha outra fase máis agresiva, con cargas, malleiras, e detencións de ata 7 persoas -segundo nos consta neste momento, aínda que poderían ser máis- entre as que se atopan tres militantes da nosa organización.

As tres militantes de Isca asistiron á manifestación disfrazados de vacas, con un cartaz coa lexenda “El gallego es para hablar con las vacas”, para poñer de manifesto o discurso oculto -e non moito- desta organización, que asocia o galego ao atraso social e que non quere que conte cos ridículos espazos dos que dispón actualmente, nomeadamente no ámbito do ensino, baixo a máscara da “liberdade” que en realidade resulta ser a segregación educativa para acelerar a desaparición da lingua propia do país.

As vacas saíron en diversos momentos, se ben foron hostigadas sempre pola policía -que arrebatou os cartazes- e polos propios manifestantes, que aplaudían as identificacións e detencións, así como as cargas policiais que sufriron outros grupos de manifestantes. Xa está convocada unha concentración de solidariedade con todas as persoas detidas para esta mesma tarde, ás 5.

Expresamos a nosa solidariedade con todas as organizacións e activistas detidos e animamos a asistir a nova concentración e a non baixar os brazos na defensa da nosa dignidade como pobo. Aproveitamos para denunciar a habitual manipulación informativa  á que nos teñen suxeitos certos medios, tentando crimizalizar a resposta popular e pacífica contra os que buscan a desparición do noso idioma.