[Día da Patria] Contra o seu sistema: conquistar a INDEPENDENCIA, construir o SOCIALISMO!

Como cada ano, Isca! estará presente nas rúas de Compostela para celebrar o noso día nacional e reivindicar, coa forza da mocidade, os dereitos que como pobo nos corresponden. Estaremos presentes o 24 de xullo por medio dun pasarrúas reivindicativo que percorrerá a zona vella da cidade, con saída de Bonaval ás 18:30h, ao remate da homenaxe que Galiza Nova organiza a Rosalía e Castelao no Panteón de Galeg@s Ilustres. E o 25 de xullo, Día da Patra, ás 12h na manifestación patriótica que o BNG convoca con saída da Alameda.

A campaña de Isca! deste ano céntrase en defendermos con clareza a nosa vía de saída da miséria capitalista que cada vez ataca con máis forza o noso pobo. Pensamos que esa saída, a nosa alternativa independentista e revolucionaria, está mais vixente que nunca, frente a un Estado español e un sistema capitalista que non teñen ningún futuro que ofertarlle á mocidade deste país. Porque sabemos que só con soberanía real teremos capacidade para construirmos un futuro socialista que devolva a esperanza a quen día a día ve como degradan as súas condicións de vida.

Só loitando temos futuro!