Dia da Patria, todas e todos a Compostela!

Actualidade política

Máis un ano, o Día da Patria encherá compostela de nacionalistas que, nun momento especialmente complexo, ergueremos ben alto a voz demandando os dereitos nacionais deste país. Contra a política destrutiva da Xunta de Galicia e do goberno do Estado, nomeadamente en materia económica e en canto á nosa lingua, a parte máis consciente deste pobo, aquelas e aqueles que non nos deixamos asimilar e pulamos por unha Galiza ceibe e popular, temos que amosar a nosa forza na rúa, enchendo de bandeiras da patria, consignas e faixas Compostela, desmontando a bucólica e turística imaxe de rexión española que o Xacobeo constrúe sobre nós. Temos que mobilizar o noso pobo en defensa doutro modelo económico e social, e da nosa soberanía nacional. Temos que sumar forzas no camiño dunha República Galega na que, con plena soberanía, poidamos construír o socialismo no noso país.

Por todo o dito, desde Isca! animamos a participar da manifestación nacional convocada polo BNG que sairá ás doce da mañá da Alameda de Compostela, e estamos a desenvolver xa neste días unha campaña propia de axitación baixo o lema “estamos construíndo a República Galega”.