Día Internacional da Clase Traballadora – 1º maio 2022

Día da Clase Traballadora

Máis un ano chega unha das datas máis sinaladas do calendario, chega o Día Internacional da Clase Traballadora, chega o 1º de maio. Hai un ano alertabamos de que as medidas que se estaban tomando desde os gobernos da Xunta, do Estado Español e da Unión Europea para solucionar a crise pandémica ían frontalmente en contra dos intereses do pobo; co único obxectivo de minimizar as perdas da patronal.

Ao desemprego, alarmantemente elevado entre a poboación máis nova, súmase un premeditado e constante ataque aos nosos dereitos colectivos que precarizan as condicións laborais, limitan as axudas sociais e coartan calquera movemento popular. E cos novos modelos de contratación, as mozas só podemos aspirar a contratos híper precarios como bolseiras, en prácticas ou de traballo temporal.

A todo isto temos que sumar a dramática suba dos prezos que podemos observar en todos os sectores nos últimos meses, en especial nos produtos de primeira necesidade, mentres o capital bate récords de beneficios. Isto, nun panorama de crise global das nosas vidas, provoca o extremo empobrecemento da nosa clase.

Porén, somos nós as que creamos a riqueza e as que movemos o mundo coas nosas propias mans. Somos nós, a clase obreira, as expulsadas e as precarizadas. Ás que nos obrigan a pagar unha débeda ilexítima que nos afoga. As que vendemos a nosa forza de traballo por salarios e condicións laborais cada día máis miserábeis. As que carecemos de poder para xerirmos os nosos recursos e decidirmos o noso propio futuro.

Por isto, desde Isca! queremos chamar á participación do conxunto da sociedade nas mobilizacións da CIG, e en particular da mocidade galega, contra o roubo e o saqueo. Por un modelo social xusto e equitativo, pola organización dunha resposta contundente contra os abusos da patronal, polo mantemento dos postos de traballo e a mellora das condicións laborais, contra a precariedade laboral e sobre todo por un futuro digno e na terra para a mocidade galega. Un futuro que debe pasar pola independencia e a plena soberanía como vía para sermos nós, como clase e como pobo, quen arbitremos o noso destino e construamos un sistema alternativo ao servizo das clases populares: o socialismo.

1º de maio:

Se a clase obreira todo o produce, a ela todo pertence!

Como cada ano, animamos a participar á mocidade rebelde das mobilizacións da CIG. Organizadas somos máis fortes:

Partíllao!

En Facebook
En Twitter
En Pinterest
Polo WhatsApp
Ou polo Telegram
Email

Deixa un comentario