Diante da súa represión, a nosa solidariedade!

Este pasado fin de semana, catro militantes independentistas galegas foron secuestradas polas forzas de ocupación españolas e sometidas á lexislación anti-terrorista cun réxime de incomunicación que vulnera os dereitos máis elementais das persoas detidas. Posteriormente foron trasladadas a Madrid para pasar a disposición do xuíz da Audiencia Nacional, que esta terza feira decretou prisión provisional sen fianza para as catro independentistas.

Queremos denunciar esta nova montaxe policial contra militantes independentistas galegas, empregando a falacia da existencia dunha suposta organización armada denominada “Resistencia Galega” inventada polo Estado español para criminalizar un proxecto político necesario para o país e o pobo traballador galego como é o independentismo. Aliás, debemos desmontar o relato do “terrorismo” usado polos poderosos para criminalizar os que cuestionan a orde dominante ao mesmo tempo que a burguesía e o imperialismo non dubidan en exercer sistematicamente a violencia e o terrorismo contra os pobos e as clases populares para defender os seus intereses reaccionarios en calquera parte do mundo.

Tamén queremos chamar a atención sobre o papel dos grandes medios de comunicación neste caso, coma sempre exercendo a súa función intoxicadora ao servizo do grande capital e o seu réxime, amplificando e difundindo o relato falso e criminalizador da Garda Civil diante da opinión pública. Estamos diante dunha montaxe policial, mais tamén mediática, que procura vincular o independentismo galego co “terrorismo” para paralizar a solidariedade coas militantes independentistas secuestradas, meterlle medo ao pobo galego e impedir a súa organización en chave nacional e de clase.

Estes feitos evidencian máis unha vez a auténtica natureza anti-democrática, reaccionaria e represiva do Estado español, cárcere de pobos ao servizo do grande capital e continuador do franquismo. Fronte a quen defende que o fascismo no Estado español son simplemente algunha ou algunhas forzas políticas, debemos lembrar que o fascismo está tamén nos aparellos do Estado, continuadores do franquismo e perpetuados pola farsa da “Transición”. Na chamada etapa “democrática” seguiron existindo centos de presos políticos independentistas vascos, galegos, cataláns, comunistas e anarquistas nos cárceres españois, alén da ilegalización de forzas políticas, torturas e mesmo asasinatos empregando o terrorismo de Estado

Finalmente, entendemos que diante dun caso represivo destas características contra militantes independentistas galegos a solidariedade debe ser o máis ampla e unitaria posíbel no seo do movemento nacional-popular galego, denunciando a represión política do Estado español e ao mesmo tempo defendendo os dereitos dos presos políticos galegos e a súa posta en liberdade da man do avance da loita pola nosa emancipación como nación e clase

Sermos independentistas non é delito!

Liberdade independentistas!