En defensa do naval, por un futuro digno na terra

O sector naval vigués, con tantas décadas de historia no noso país, xerou até hai dous anos máis de 10.000 postos de traballo e podería seguir a ser plenamente competitivo, porén, está nunha situación agónica e ao borde da desaparición. Nunha situación coma esta de progresiva devastación social, a morte do naval suporía un golpe definitivo para unha comarca que está a sofrer especialmente as desastrosas políticas dos gobernos ao servizo do capital.

A responsabilidade directa recae nas políticas da UE, o papel que lle teñen asinado a Galiza no capitalismo europeo e mundial e os intereses das empresas do sector que operan noutros países, que presionan para un novo agravio comparativo no que os nosos sectores produtivos volven ser moeda de cambio na UE.

Mais a urxencia dunha resposta unitaria non debe facernos ocultar responsabilidades que non son menores. Agora, que todo o mundo parece ser consciente dunha realidade que o sindicalismo nacionalista leva denunciando por medio da mobilización desde hai bastante tempo, cómpre sinalar a responsabilidade e complicidade de PP e PSOE, cuxos sucesivos gobernos deron tamén lugar a esta situación e que colaboraron en primeiro crear e logo ocultar o problema.

Xunto á pasividade, indigna tambén que pretendan facernos ver que pouco ou nada se podería facer contra unha resolución negativa da UE. Os mesmos que rescatan bancos con cartos públicos a cambio de recortes sociais, negan calquer medida política que sirva para dinamizar a economía produtiva como as que se teñen aplicado noutros países, por non falar xa de posibilidades como a da nacionalización para reflotar um sector perfectamente viábel.

Por iso chamamos a continuar e aumentar a mobilización en defensa do naval, particularmente na mobilización que sairá o 11 de xullo ás 20:00h desde a Praza dos Cabalos en Vigo. A loita obreira e popular é o único que pode evitar que se consume o o asalto definitivo contra un sector fundamental na comarca de Vigo. E ao igual que en Ferrol, a folga xeral na comarca debe ser tambén máis un paso nesta loita polo futuro digno que demandamos e que este sistema pretende negarnos.