[Encontro formativo] Micromachismos: identificalos, combatelos, eliminalos!

Desde Isca! acreditamos na (auto)formación como unha das ferramentas precisas para loitarmos contra o sistema de vida e de relacións que nos impón o capitalismo e o patriarcado, mellorando a nosa capacidade de acción política e militante para así transformar a realidade que nos tocou vivir. Pensamos que aprender sempre é a mellor maneira de avanzarmos en construír alternativas aos poderes que nos queren ignorantes e submisas.

Dentro das múltiples batallas que temos abertas como mozas revolucionarias e feministas está a de reivindicar que a violencia contra as mulleres non é só física e que precisamente o patriarcado estruturou socialmente a violencia contra as mozas mediante un proceso de invisibilización das súas agresións, facendo que se naturalizasen até o punto de que o día a día no que vivimos, traballamos, estudamos, nos relacionamos e combatemos non convida a cuestionalas, facéndoas aínda máis perigosas ao non ser identificadas e, moito menos, cuestionadas para ser mudadas.

O feminismo ensínanos permanentemente a necesidade de aprender unhas das outras, de escoitar para analizar, cuestionar e transformar aquilo que nos somete. Por iso, desde Isca! convocamos este encontro formativo* coa pretensión de, entre todas, mellorar o noso coñecemento sobre a violencia simbólica e aquilo que Luis Bonino denominou micromachismos. Cremos que as mozas, lonxe dos aparentes avances nas xeracións máis novas, sufrimos constantemente este tipo de agresións no noso cotián e é preciso sermos conscientes de que as padecemos para identificalas e así combatelas e traballar para eliminalas, desde o individual e o colectivo, sumando esforzos na batalla de erradicar progresivamente todas as manifestacións da violencia de xénero e do sistema patriarcal.

*Este encontro celebrarase o vindeiro 17 de maio a partir das 16:30h no local nacional do MGS [Avenida de Castelao, 30, baixo] e está aberto e a quen quixer participar, mais por cuestións organizativas, se queres asistir precisamos que nolo comuniques no correo info@iscagz.org