Futuro digno na nosa terra!

Desde Isca! pomos en marcha unha nova campaña nacional que terá como ponto de partida o 1º de maio, data de referencia na loita obreira e popular. Nela, baixo o lema “futuro digno na nosa terra!” queremos denunciar un sistema que nos condena á emigración, ao desemprego e á falta de perspectivas laborais e de vida digna no noso país. Nela enmarcaremos diferentes actividades de denuncia dunha situación xa insuportábel para a mocidade, e que ten como responsábeis un sistema capitalista cada vez máis cruel e corrupto e as súas estruturas de poder, comezando polo Estado Español que nega a capacidade do noso pobo de dispor do seu futuro e desnvolver axeitadamente a súa economía.

É tempo de organizarse e de loitar sen medo por un futuro digno para a mocidade, e iso pasa necesariamente non por parches ou remendos no sistema, senón por romper de raiz con todas as estruturas de dominación: España, o capitalismo e o patriarcado. Para iso cómpre unir cada vez máis loitas e tecer resistencias no camiño dun proxecto transformador global que na nosa nación pasa pola conquista de independencia nacional como única vía viábel de saída do capitalismo, a construción do socialismo e o fin de toda opresión.

Esta campaña pretende ser a nosa contribución para avanzar cara a eses obxectivos respondendo desde xa á abafante realidade coa que se atopa a mocidade galega.