Isca! ante a unificación do soberanismo estudantil

Como xa é manifesto, este sábado 5 de marzo está convocada a Asemblea Nacional Constituínte da nova organización do estudantado galego que abranguerá o estudantado nacionalista e independentista. Esta nova organización xorde da unión das tres organizacións estudantís con ideoloxía soberanista do país: Agir, Comités Abertos e Liga Estudantil Galega.

A finalidade desta unión é fornecer ao eido estudantil un maior músculo e potencialidade de acción para así loitar por un ensino público, galego, feminista, científico e de calidade. A idea da unión das tres organizacións e a súa apertura, asemade, a persoas independentes que queiran comerzar a participar na loita estudantil comezou coas Asembleas de Base. Estas asembleas comezaron a camiñar por todo o país a finais do ano 2015 e, logo de todas as dificultades que xurdiron polo camiño, a Asemblea Nacional Constituínte é un feito real e tanxíbel. Esta unión pon fin ao camiño que en 2011 iniciou a Liga Estudantil Galega. Unha aposta de autoorganización do estudantado na que participamos, xunto con moitos outros actores, superando modelos anteriores xa esgotados, que servise para construír as ferramentas válidas, combativas e revolucionarias que o ensino deste país demanda.

Desde Isca! saudamos e desexamos que a nova organización estudantil que naza o 5 de marzo sexa unha organización con forza para podermos loitar por un ensino público, galego e de calidade; con firmeza nos seus obxectivos estratéxicos mais coa necesaria flexibilidade táctica. Para rematar, queremos desexar a todas as estudantes que se incorporan nesta nova etapa moita sorte e ánimo para acadaren os seus obxectivos. O estudantado galego está en loita!

Libera e transforma Galiza desde as aulas!