Isca! ante a visita do Papa a Compostela

 A mocidade organizada en Isca opómonos á visita do Papa ao noso país que vén de agravar máis aínda, se cabe, a situación de estado policial á que o Xacobeo somete Galiza para lucro de moi poucos e permanente acoso sobre os movementos sociais e organizacións políticas. Facémolo, ademais de por esta situación de permanente control represivo, por todo un cumio de motivos:

 -Porque non podemos aceptar que, mentres o discurso da austeridade serve para desmontar servizos e conquistas sociais gañados ao longo de décadas de loita, as autoridades públicas gasten millóns de euros nun evento que non repercutirá en absoluto nin a curto nin a medio prazo na nosa economía, máis alá de afortalar a nosa dependencia do turismo e, xa que logo, a nosa dependencia económica e política do exterior, nomeadamente de España, en vez de apostar polo desenvolvemento duns sectores productivos no camiño da nosa plena soberanía.

 -Porque rexeitamos o discurso machista, homófobo e terribelmente patriarcal da Igrexa Católica, e nomeadamente do seu pontífice, que non se priva de sentar cátedra en materia de sexualidade e delimitar o normal e o “desviado”, mentres persoalente ocultou durante anos centos de casos de abusos a menores por parte de membros da súa Igrexa.

 -Porque acaba co desexado laicismo das institucións públicas, sendo a asistencia de líderes políticos a estes actos e a mobilización de todos os recursos do estado unha especie de copia, tantos anos despois, do Nacionalcatolicismo teoricamente superado e que, porén, volve facer acto de presenza para lembrarnos de onde vén este Estado “democrático”.