Lánzase a “Proposta Militante”, por un proxecto coherente, combativo e transformador para Galiza Nova.

Actualidade política

A nosa organización fixo público nas últimas semanas un documento que amosaba a nosa propia análise do acontecido neste periodo interasemblear, marcando as eivas a correxir así como a nosa proposta de estratexia política e organizativa a seguir de aquí en diante para afortalar Galiza Nova.

Como analisamos no citado documento, a situación que a nosa organización viviu nestes dous anos así como as divisións que esta provocou, complicaban a posibilidade de artellar unha única lista.

Por isto, Isca! anunciou a súa intención de participar na XI Asemblea Nacional cun descurso propio, tal e como se veu facendo no proceso de presentación e debate de emendas nas comarcas, onde se defenderon as proposta de traballo ideolóxicas e organizativas para Galiza Nova.

É con este obxectivo que promovimos unha candidatura, “Proposta Militante”, conformada por militantes independentes e da nosa organización, que permitirá a existencia na Asemblea Nacional dun descurso crítico e combativo, baseado na defensa dunha organización operativa, plural, de esquerdas e cun forte discurso soberanista, así como unha alternativa real ás dinámicas organizativas e de traballo que se deron até o momento, isto é, os principios básicos que aparecen recollidos no decálogo apresentado no blogue da candidatura, que fará pública a lista completa de integrantes da mesma o vindeiro martes 20 de outubro.