Magosto solidario o 15 de novembro na Coruña

Actualización: O magosto solidario de hoxe na Coruña finalmente dará comezo sobre as 20:30 (ao remate da concentración de Nunca Máis no Obelisco). Por problemas alleos á nosa vontade vémonos na obriga de cambiar a orde das actuacións musicais, tendo a Xurxo Souto primeiro ás 20:30 e logo a foliada. Todo acompañado de castañas e queimada de balde!

* * * * * * * *

Hai días dabamos conta do acontecido a tres militantes da nosa organización por realizar actividade política na cidade da Coruña, que se está a converter nun dos puntos quentes da resposta do poder contra os movementos sociais con multitude de activistas multadas ou mesmo enxuízadas por denunciar publicamente a situación de miseria na que vivimos, e que finalmente foron obxecto de varias sancións administrativas.

É por isto que desde Isca! da Coruña organizamos unha festa solidaria, unha festa de noso, un magosto. Defínese magosto como a reunión festiva de xente co fin de asar e comer castañas, unha tradición secular no noso País, acompañada desta volta dun marco solidario. Por iso queremos convidarvos a todas a que vos pasedes o vindeiro venres día 15 polo Bar Faluya (Rúa Orzán nº 75) para facer entre todas unha festa propiamente galega e popular.

A partir das 20 horas contaremos cunha pequena foliada e coas primeiras castañas asadas e, por volta das 22 horas, estará con nós Xurxo Souto (ghaiteiro!) que lle dará ritmo e ánimo á noite. Todo isto acompañado de boa música e prezos populares.

Anímate e ven celebrar o magosto con nós!