Manifestación antitouradas en Pontevedra

Actualidade política

Máis un ano, Pontevedra terá unha mobilización popular de resposta ao sanguento espectáculo das touradas, apoiada por diversas organización, entre elas a nosa. Será o sabado 11 de agosto ás 20 h desde a Praza da Peregrina. A seguir reproducimos o manifesto de “Touradas fora de Pontevedra”:

As touradas están baseadas na tortura, a dor e o ensañamento co touro. Transmiten valores negativos, como o uso inxustificado da violencia, o desprezo cara os dereitos dos animais, o goce coa tortura e o maltrato animal.
As tradicións deben funcionar como soporte do que nos define e constrúe, mais tamén do que esperamos no futuro. Aquelas que están sustentadas na violencia e no aniquilamento non fan máis que perpetuar comportamentos que deben ser rexeitados da sociedade.

Ademais, para os galegos e as galegas, as touradas non teñen nada que ver coa nosa historia nen coa nosa cultura, chea de tradicións populares que esmorecen e que si son dignas de recuperación.
Segundo diversas enquisas, o 90% consideramos que a tortura dos animais como diversión debe ser suprimida, e a inmensa maioría da poboación nunca asistimos nen asistiremos a unha corrida de touros.
As tempadas taurinas, as escolas e as ganderías son financiadas con diñeiro público que tamén pagamos as galegas e os galegos que somos os que menos interese temos en todo o estado.

Por todo isto demandamos:

1. Ao goberno do estado que faga os cambios lexislativos necesarios para a abolición das touradas e a paralización da súa promoción e subvención con diñeiro público que en plena crise ascende a 600 millóns de euros.

2. A Deputación de Pontevedra que as deixe de subvencionar directa
ou de forma encueberta (60.000 euros recoñecidos)

3. Que o Parlamento de Galiza modifique a “Lei 1/1993 de Protección de Animais Domésticos ou Salvaxes en Cautividade” que exclúe no seu artigo 5º as touradas, para que prohíba estas actividades.

4. Ao Concello, o cese do uso de espazos públicos para a promoción das touradas, así como a declaración de Pontevedra como “Cidade Antitouradas e amiga dos Animais”.

5. A reconversión da Praza de Touros nun Coliseu para espectáculos culturais e concertos.

A abolición das touradas non é unha utopía como demostran os exemplos de Catalunya e Canarias.