[Mobilización na Coruña] Contra a ditadura da troika: independencia

No día de hoxe, luns día 22 de xullo, a partir das 21 horas terá lugar unha mobilización na Coruña baixo o lema Contra a ditadura da troika: independencia sendo a primeira iniciativa deste tipo que terá lugar na cidade herculina. Desde Isca! non podemos se non chamar a toda a mocidade a participar deste acto, incluído nunha serie que se veñen realizando como preparativos do Día da Patria, facendo do mesmo unha demostración unitaria e plural da necesidade da soberanía nacional e a independencia para ter futuro como pobo.

A continuación reproducimos o manifesto da convocatoria:

Contra a ditadura da troika: independencia

A escasos días dos festexos e das reivindicacións propias do Día da Patria, as persoas da Coruña comprometidas na loita contra o asoballamento e a españolización da Galiza decidimos xuntarnos para manifestar que na nosa cidade tamén nos rebelamos contra o capitalismo, o imperialismo e o heteropatriarcado, e encontramos na liberación nacional a solución máis congruente cos nosos intereses.

Este ano, con case 300 000 persoas no paro, 120 000 vivindo na pobreza extrema e decenas de mozas e mozos emigrando da Galiza a diario, observamos unha situación de retroceso preocupante e sen parangón tanto no plano dos dereitos civís e políticos, como no económico e social.

Entendemos que os mandatos da troika formada pola Comisión Europea, o Banco Central Europeo e o Fondo Monetario Internacional só serven para agravar a situación de crise económica e social que vivimos, destruíndo desde os sectores produtivos do noso país (naval, agropecuario e pesqueiro) aos servizos básicos universais de sanidade e educación.

Denunciamos tamén o desmantelamento dos servizos ferroviarios de proximidade, así como dos centros de planeamento familiar, a supresión de leis e servizos en favor da igualdade, e a intromisión de poderes políticos machistas e submisos á Igrexa Católica na decisión que as mulleres tomen a respecto do seu corpo e da súa gravidez.

Rexeitamos a contra-reforma educativa da LOMCE e a españolización da educación: pulamos por un sistema educativo público, laico, coa igualdade de oportunidades entre todas e todos os alumnos como referencia de base, e na nosa lingua.

Por desprestixiar os colectivos sociais que realmente se preocupan de recuperar a nosa identidade e que diariamente traballan na defensa da lingua galega e a súa internacionalización, non acreditamos nunha RAG patriarcal, españolista e subxugada a unha Xunta de Galiza interesada en borrar de nós a historia e os costumes. Non acreditamos en ningún dos organismos da Xunta que din estar orientados á defensa e normalización da nosa lingua e da nosa cultura: dinnos que debemos ser bilingües, e promoven que a lingua galega, con séculos de historia e todas as palabras precisas para a comunicación cotiá ou artística, sexa un mero elemento de folclore do que lembrarnos un par de días ao ano.

Vivimos un momento de alarmante retroceso en materia de dereitos civís: mentres organismos economicidas deciden por nós, sen contar connosco, a lexítima defensa activa dos dereitos fundamentais á vivenda, ao traballo e á educación é criminalizada e penalizada polo Estado Español, sobre todo cando se trata de persoas que acreditan na emancipación nacional para xestionar con liberdade os nosos propios recursos. Manifestamos por iso a nosa solidariedade coas presas e cos presos políticos dispersados, que están sendo xulgados con medidas de excepción por seren independentistas.

Queren que pensemos que non temos dereito a ser un país porque somos só españolas con avoas que falan unha lingua que morre, mais nós comprometémonos a recuperar a lingua e o patrimonio etnográfico; e a construír unha comunidade que garanta a todas as cidadás a satisfacción das necesidades básicas de alimentación, vivenda, educación e coidados. Onde os hipotéticos dereitos dun embrión non se antepoñan aos das mulleres, que decidirán libremente se queren ser nais, cando queren selo e como organizarán a súa maternidade.

España e a Troika queren que a nosa nación deixe de existir, e nós loitamos para que renaza; e sobre un pasado de reino construiremos unha Galiza socialista e feminista.