Mobilizámonos contra o TTIP, o acordo definitivo contra os nosos dereitos

O TTIP é o acordo soñado polos grupos empresariais máis grandes das dúas beiras do océano atlántico. O obxectivo que quere conseguir é a eliminación das normativas que afectan ás relacións entre empresas transnacionais que operan tanto nos EEUU como na Unión Europea disfrazando tal fin como un fortalecemento comercial. Os primeiros contactos entre a Comisión Europea e o goberno estadounidense, non confirmados até moito tempo despois, datan do ano 2011 e a partir dos cales se emprenderon unha serie de reunións cos representantes das redes empresariais máis potentes.

O TTIP non é só un acordo comercial tradicional centrado na redución duns aranceis sobre as importacións duns socios comerciais que xa son moi baixos e que apenas poderían reducirse máis. O principal obxectivo é eliminar aquelas normativas, aquelas regulamentacións que podan supor unha «traba» para os beneficios das empresas transnacionais. Isto implica, en esencia, a práctica eliminación de multitude de normativas en segredo para evitar no posíbel o debate e a resposta popular.

O acordo é un ataque de grande envergadura contra os dereitos sociais, laborais, ambientais e civís, xa de por si insuficientes na Unión Europea. Busca tamén crear novos mercados abrindo o sector dos servizos públicos ás corporacións transnacionais, o que ameaza con privatizacións masivas na sanidade ou na educación. Mais unha das medidas máis preocupantes do TTIP é que pretende conceder a investidores estranxeiros o dereito a demandar os estados soberanos ante tribunais de arbitraxe privados, creados a tal efecto sen ningún tipo de garantías nin control, para reclamar perdas resultantes de decisións sobre política pública. Eleva o capital transnacional a un status equiparábel ao dun estado, con todo o que iso supón.

Mobilicémonos contra o acordo

Desde Isca! animamos a toda a mocidade a participar nas convocatorias feitas pola CIG en distintas cidades e vilas galegas coincidindo cunha xornada internacional contra este tratado o vindeiro sábado día 18.

• A Coruña : 12:00 horas diante da Subdelegación do Goberno.
• Ferrol: 12:00 horas horas na Praza do Himno.
• Compostela : 11.30 horas na Praza de Galiza.
• Lugo: 12:00 horas na Praza Maior.
• Ourense: 11.30 horas diante da Subdelegación do Goberno.
• Pontevedra : 20:00 horas na Praza da Peregrina.
• Vilagarcía : 12:00 horas na Praza de Galiza
• Vigo : Manifestación ás 20 horas, saída desde A Farola de Urzaiz.

.

>> O TTIP, o acordo soñado polo capital transnacional. Caderno de formación de Isca!

>> TTIP, un acordo transnacional contra todos os nosos dereitos. Artigo de Antolín Alcántara.