O 22 de xullo a mocidade celebra en Ourense o Día da Patria a pé de rúa

Como vén sendo habitual nos últimos anos, diversas organizacións políticas e sociais xuvenís da cidade de Ourense convocan un acto para celebraren o Día da Patria e reivindicar o rexeitamento do marco xurídico-constitucional vixente e o desexo de dotar a Galiza de plena soberanía.

A mobilización consistirá nun pasarrúas con saída ás 20:30 horas do luns 22 de xullo desde a Subdelegación do goberno (Parque de San Lázaro) sob o lema “Independencia” que encabezará a comitiva. Así mesmo, anímase aos participantes a levaren instrumentos e bandeiras da patria para acompañar o percorrido, que irá polas rúas da zona vella até rematar nos Xardíns do Pai Feixoo. Neste lugar terá o acto político de peche, no que se dará lectura ao manifesto conxunto que presentaron o pasado 2 de xullo as organizacións convocantes da manifestación xuvenil independentista unitaria prevista para o vindeiro 24 de xullo ás 20:00 desde a Alameda de Santiago de Compostela.

Desde Isca! saudamos ambas as dúas convocatorias e parabenizamos á mocidade organizada deste país dentro das coordenadas do independentismo e da esquerda transformadora, que é quen de tender pontes para favorecer a creación de espazos de loita e acción unitaria que afortalan o obxectivo estratéxico de erguer unha alternativa contraposta ao Estado español e o sistema capitalista.

Así mesmo, desde Isca! reiteramos a nosa condea á vaga de multas que se sucederon o ano pasado despois de celebrarse o acto na cidade ourensá e que foron desproporcionadas na súa contía e totalmente inxustificadas na súa imposición. Un ano despois, malia os intentos de criminalización do independentismo, a mocidade rebelde non se bota atrás no seu deber de reivindicar na rúa os dereitos nos que cremos e o futuro que queremos para a nosa terra. Nin un paso atrás até conquistar a vitoria! Independencia!