O capitalismo é a ruina do pobo traballador. Que marchen!
- Actualidade política
O día 6 de Outubro celebrarase na Coruña o Congreso da “Confederación Española de Directivos y Ejecutivos”. No evento reuniranse representantes da oligarquía mundial como Carlos Slim, César Alierta ou Pablo Isla, así como as máximas expresións institucionais do réxime entre os que destacan o rei Felipe VI e Mariano Rajoy. Todo isto, coa presenza tamén do propio alcalde do Concello.
Desde Isca! rexeitamos este Congreso, o xuntar na nosa Terra aos culpábeis da actual situación que atravesa a mocidade galega: directivos das grandes empresan que explotan á xuventude condenándoa a emigración ou a precariedade, negándonos un futuro digno; o xefe do goberno que aplicou nos últimos anos os retallos máis drásticos en dereitos laborais desde a ditadura franquista.
Cunha taxa de desemprego no país do 21,8% e cunha destrución de emprego que duplica a do Estado Español, o panorama para a mocidade galega é desolador, máis se temos en conta que os datos de desemprego xuvenil ascenden a máis do 50% na Galiza. Fronte o discurso de recuperación económica e prosperidade que nos vende a patronal e os executivos central e autonómico, atopámonos ante os peores datos das últimas décadas, que non paran de empeorar ano tras ano.
Por todo isto somos conscientes que o discurso que nos levan repetindo dende o comezo da crise os sindicatos españois de pacto e paz social co goberno e patronal só leva ao noso pobo a ruína, e ollamos con preocupación que os supostos movementos cidadáns chamados a gobernar para o 99% acollan a ese 1% culpábel da miseria na que vive a clase traballadora.
En definitiva, acreditando na loita de clases como motor de cambio ao longo da historia, e sabemos que nada bo podemos agardar dos grandes capitalistas que ano tras ano multiplican os seus beneficios a custa de condenar a clase traballadora a precariedade e a explotación. Se queremos mudar o panorama actual para a mocidade só nos queda loitar polo noso futuro contra este sistema, avanzado nun novo modelo económico e social cunha lóxica anticapitalista que redistribúa a riqueza garantindo unha vida digna a toda a poboación.
.
Actos de protesta:
> Concentración “Galiza a favor do pobo soberanía, democracia, traballo” ás 12:00 horas no Palexco. Convoca o BNG da Coruña. [+ info]
> Congreso anticapitalista. Acción simbólica a partir das 18:30 horas no Obelisco coa presenza de persoas afectadas polas medidas antipopulares levadas adiante pola oligarquía. [+ info]
