O intento de calar a mocidade rebelde

“Traballo digno na nosa terra” é a frase de orde escollida desde Isca! na campaña que vimos realizando desde hai uns meses reclamando un futuro digno e sen explotación onde a mocidade galega non sexa condenada á pobreza, á precariedade, ao desemprego ou á emigación. Pobreza, precariedade, desemprego ou emigración son problemas que sofre toda a clase traballadora mais que inciden especialmente nas persoas máis novas por iso é para nós fundamental visibilizar a urxencia da loita social fronte ás mentiras que emanan desde o goberno español e desde a Xunta do Partido Popular. Visibilizar, polo tanto, o conflito, denunciar en cada recuncho do país e das nosas rúas o permanente estado de agresión ao que nos somete o poder.

No marco deste traballo de denuncia tres militantes da nosa organización foron abordados, a madrugada do pasado mércores, por dúas patrullas da policia, unha deles camuflada que procederon á súa identificación e posterior rexistro das súas pertenzas e do vehículo que estaban utilizando. Metodicamente foron estudados e algúns requisados diversos materiais axitativos, desde volantinas e voceiros até plantillas e pinturas. Após máis de media hora de retención os tres compañeiros foron liberados e denunciados por un presunto delito de danos en bens inmobles.

A persecución que na Galiza e concretamente na Coruña se vén realizando nos últimos meses contra os movementos de resposta social é evidente e palpábel con multitude de activistas sancionadas ou mesmo enxuizadas por denunciar publicamente a situación de miseria na que vivimos. As declaracións e actuacións de autoridades e policía van na dirección de calar, reprimir ou impedir toda disidencia ao sistema e nomeadamente a quen o fai desde unha óptica independentista e anticapitalista, chamando poderosamente a atención a utilización dos medios de comunicación para crear unha falsa realidade, como no caso que nos ocupa, exercendo estes de altofalantes das autoridades reproducindo falsedades, cun fin criminalizador.

O que é claro é que non conseguirán calar o descontentos ocial por medio da represión e que seguiremos contestando, malia todo, nas aulas, nos centros de traballo, na rúa e tamén nas paredes reclamando un futuro digno e na terra, en liberdade e sen explotación!