[Països Catalans] Romper co réxime para mudalo todo!

Na senda do pobo catalán

As mozas revolucionarias organizadas en Isca! queremos mandar un saúdo e toda a nosa solidariedade á mocidade revolucionaria catalana, nomeadamente ás compañeiras de Arran, na xornada previa ao Día Nacional dos Països Catalans, que loitan de xeito incansábel pola independencia e o socialismo da súa nación.

Como xa temos analizado, o proceso soberanista catalán é hoxe a maior ameaza para a estabilidade do réxime español e o sistema que sustenta, pois aspira a tronzar por fin o “consenso constitucional” herdeiro do franquismo.

Existe o erro común (moitas veces intencionado), particularmente en certos sectores da esquerda máis desnortada, de atribuír a CiU ou mesmo á burguesía catalá a responsabilidade e protagonismo exclusivo do proceso. Porén, nada máis lonxe da realidade. Se Artur Mas, CiU e mesmo algúns sectores da burguesía se sitúan hoxe do lado do dereito a decidir e mesmo da proposta independentista é por medo a ficar fora de xogo nun novo cenario político onde, froito da mobilización e organización popular (combinada coa constatación da incapacidade do Estado de recoñecer no seu seo ningunha identidade ademais da española), a vontade soberanista é xa hexemónica. As consultas municipais pola independencia, as plataformas e movementos amplos pola soberanía e o rico tecido asociativo de base foi até agora e debe ser o principal protagonista do que pode considerarse xa unha revolución democrática.

É precisamente a activación e a mobilización popular a que pode tamén superar as limitacións derivadas das dinámicas impostas polas forzas hexemónicas nas institucións. A garantía será que o peso do proceso siga na rúa, lonxe dos pactos entre cúpulas para conxurar a tentación de utópicas “terceiras vías”. Para iso está a ser fundamental tamén o papel da esquerda independentista articulada arredor da CUP, de cara a estender a necesidade do exercicio da desobediencia ante o estado e as súas leis impostas, introducir no debate o marco nacional completo (os Países Cataláns) e defender un discurso cada vez máis popular onde a independencia é a ferramenta para transformar de raíz as condicións de vida.

Igualmente, na Galiza cómpre entender a independencia como a ferramenta imprescindíbel que nos permitirá tomar as redes do noso futuro e transformar radicalmente a realidade. Evidentemente, dispormos dun estado propio non supón por si mesmo un cambio de sistema socio-económico mais é unha necesidade imprescindíbel se queremos dispor de condicións reais para facelo.

Mentres na maior parte do estado español a dialéctica política dáse fundamentalmente en base ás chaves discursivas do reformismo español, o único lugar do estado onde está ao alcance da man a conquista dunha nova república e dun proceso constituínte é precisamente Cataluña. Por iso chama a atención que a dita “esquerda” española se declare contraria á independencia e por tanto defenda que os cataláns sigan a ser súbditos da monarquía española cando teñen ao alcance da man rachar co réxime español.

Non só o pobo catalán se xogará o seu futuro colectivo nos próximos meses. Ao conxunto de pobos oprimidos polo estado español vainos a vida na posibilidade de abrir unha porta de emancipación que nos saque deste estado corrupto e decadente do que aínda facemos parte. Por iso, aproveitando a conxuntura é máis importante que nunca a pedagoxía soberanista entre o noso pobo, e particularmente entre a mocidade, para espallar a conciencia de que só por medio do dereito a decidir (a decidilo todo) será posíbel construírmos colectivamente unha vida digna. Aínda sendo conscientes da correlación de forzas actualmente desfavorábel no noso país, e precisamente por iso, é necesario artellar desde xa, desde a base e en todos os ámbitos un proceso independentista, unha vía galega cara á emancipación nacional que nos dote de ferramentas políticas para transformar este sistema e rematar con toda forma de opresión.

Acto en Compostela

Coincidindo con actos que con motivo da Diada do 11 de setembro teñen programados a Assemblea Nacional Catalana e demais entidades soberanistas, a plataforma Galiza con Catalunya realizará unha réplica simbólica en Compostela, na Praza da Quintana para o que animamos a todas as persoas solidarias coa causa dos pobos e a liberdade a participar, ás 19:00 horas

.

Visca la terra, visca els Països Catalans lliures!

Independència, socialisme i feminisme!

Desobediència!