Perante o asasinato dun cidadán galego en Madrid

Desde a organización xuvenil Isca! condenamos o brutal asasinato dun seareiro deportivista no día de onte en Madrid a mans de adeptos do Atlético de Madrid vinculados co grupo neonazi Frente Atlético, e transmitimos as máis sentidas condolencias á familia, achegados e, en xeral, a todo o deportivismo.

Na mañá de onte máis dun centro de persoas fortemente armadas, vinculados co grupo neonazi Frente Atlético, atacaron e feriron de diversa consideración a un grupo de deportivistas que se atopaban no distrito de Madrid Rio. Especialmente brutal foi a agresión a Jimmy, golpeado por varias persoas e posteriormente guindado ao rio Manzanares, sendo rescatado xa en parada cardio-respiratoria. Desgraciadamente faleceu horas despois no hospital.

A prensa do capital non dubidou en intoxicar desde o primeiro momento, equiparando agresores e agredidos, fascistas e antifascistas. Ocultando de xeito deliberado a ideoloxía política do Frente Atlético, presentounos á vitima como un violento, díxonos que a súa vida non tiña valor ou mesmo que o merecía. Mostrounos extensos reportaxes sobre os seareiros deportivistas, sobre as bandeiras que portan no estadio (estreleiras) ou sobre a súa historia mais case nada dixo dos moi diversos episodios de violencia política que se dan nas rúas de Madrid contra militantes antifascistas e que teñen a súa orixe en persoas directamente vinculadas ao Atlético de Madrid, e para mostra os seus referentes: os asasinos de Aitor Zabaleta ou Carlos Palomino. Curiosa actuación tamén da Policía española, cuxa efectividade para a represión contra os movemento independentistas ou de contestación social (como vimos hai uns días nun despexo en Elviña, na Coruña) non pareceu tanta para evitar o asasinato.

Alén das consideracións que podamos facer sobre o mundo do fútbol, sobre a masculinización e a violencia que se da no seu entorno ou sobre a apropiación que o capital fixo del, é momento de denunciar as razóns netamente políticas deste crime, a ocultación e protección que os medios do capital e as institucións vinculadas ao fútbol (Liga e Federación) están a facer dos grupos da extrema dereita como o Frente Atlético e reivindicar máis que nunca a necesidade dunha sociedade sen fascismo, nin nas rúas nin nas bancadas.

DEP Jimmy. Que a terra che sexa leve.

Non pasarán!