[Pontevedra] A ferramenta contra a explotación e o desemprego xuvenil

As militantes de Isca! acreditamos na formación como unha das ferramentas precisas para loitarmos contra o sistema de vida que nos impón o capitalismo, mellorando a nosa capacidade de acción política e militante para así transformar a realidade que nos tocou vivir. Pensamos que aprender sempre é a mellor maneira de avanzarmos, construindo alternativas aos poderes que nos queren ignorantes e submisas.

Galiza ten 135.000 persoas menos de entre 16 e 35 anos a día de hoxe que en 2007. Só no período 2013-2014 abandonaron o noso país unhas 24.000 mozas, por causa do desemprego, a miseria e a precariedade. O desemprego xuvenil supera o 50%, tanto é así que na última década a mocidade pasou de representar o 23% da poboación activa a pouco máis do 12%, pasando a ser practicamente residual no conxunto das traballadoras ocupadas. Estannos a roubar o futuro. Non hai emprego e o pouco que hai é precario e en condicións de explotación extrema. O número de contratos lixo (contrato temporal, contrato de formación e aprendizaxe e contrato de prácticas) non para de aumentar e a temporalidade crece até o 15% dos contratos vixentes.

Coñecer en profundidade esta realidade e as ferramentas que ten a mocidade para combatila é o obxectivo do acto que organiza Isca! en Pontevedra o vindeiro mércores día 25 de marzo baixo o título O Sindicalismo: a ferramenta contra a explotación laboral e o desemprego xuvenil. Nel respostaremos a preguntas como cal é a situación laboral e económica na actualidade e como foi o seu percorrido os últimos anos, en que consistiron as reformas que se levaron a cabo nos últimos tempos e como afectan á mocidade ou a importancia da ferramenta sindical para organizármonos no eido laboral. Porque sabemos que contra o individualismo e o apoliticismo que nos tentan inculcar, é tempo de dar a batalla, de organizarse e de loitar. A historia demostra que todos os dereitos cos que ainda contamos e que agora tentan arrebatarnos foron conseguidos con esforzo e a loita de xeracións que defenderon un mundo mellor, sen medo a comprometerse.

Vémonos neste encontro formativo no local do BNG de Pontevedra (rúa Marquesa nº3, 2º I) a partir das 19:30 horas no que contaremos coa presenza de Ramiro Oubiña, sindicalista da CIG e membro da súa Executiva Confederal.