Proposta Militante apresenta publicamente a súa candidatura á DN de Galiza Nova

A Proposta Militante apresentou hoxe publicamente a súa candidatura á Dirección Nacional de Galiza Nova, que será escollida este domingo na XI Asemblea Nacional desta organización xuvenil.

A plataforma, composta por integrantes de Isca! e militantes independentes, escolleu á Noa Presas Bergantiños, militante da comarca de Ourense, integrante da Dirección Nacional saínte e membro do Consello Nacional do BNG, como a súa cabeza de lista. Presas, que compareceu arroupada por outros nove integrantes da candidatura, explicou os posicionamentos ideolóxicos de Proposta Militante, que avoga por democratizar e reforzar a organización, desde parámetros nidiamente soberanista e anticapitalistas: “queremos unha Galiza Nova soberanista que pule por un Estado própio para as galegas e os galegos;de esquerdas, que mobilice á mocidade pola liberdade, a democracia e o progreso social; activa, implicada no asociacionismo galego e respeituosa cos distintos movimentos sociais; que integre as diversas liñas de actuación do feminismo combativo; e autónoma a respeito do BNG, para non funcionar como unha mera correa de transmisión”.

A segunda integrante da lista é Laura Arjonilla, responsábel local de Compostela, que tamén interveu na comparecencia pública para explicar os criterios de confección da candidatura: “un rico abano de militantes procedentes de distintas comarcas ao longo do país, caracterizados polo seu compromiso activo en movimentos asociativos de todo tipo, sindicais, estudantís, ou culturais, e pola súa implicación na vertebración dun movemento xuvenil nacionalista que faga fronte ás políticas da dereita”. Estudantes, traballadores da hostelaría, labregos, mestres, xornalistas, técnicos, investigadores, mozas e mozos militantes de distintas idades -de 24 anos de media- decidiron participar nesta candidatura para abrir un debate transformador en Galiza Nova. Arjonilla tamén engadiu que “por riba de todo isto son militantes comprometidos co país e coa clase traballadora, e capacitados para abrir unha nova etapa en Galiza Nova, á altura dos moitos desafíos impostos pola dependencia nacional e o capitalismo”.

Por último, Presas tamén explicou que a Proposta Militante representa “unha emenda á totalidade” ao funcionamento das correntes políticas convencionais, ao basearse “nos debates e nas iniciativas colectivas e solidarias, e non nos verticalismos e persoalismos”, porque “se queremos un mundo distinto, tamén nós debemos actuar doutra forma”. Neste sentido, sinalou que a plataforma realizou un esforzo organizativo ao longo do proceso preasemblear para que todos os seus integrantes puidesen participar en pé de igualdade en todo momento, a través de reunións abertas e democráticas e do fluxo constante de información: “non se nos pasaría pola cabeza facelo doutro xeito”.