PSOE iguala agredidos e agresores
- Actualidade política
O PSOE, fiel á sua tradición de igualar opresores e oprimidos, anunciou hoxe a presentación de mocións en todos os concellos do Estado para condenar a acción militar de Israel en Gaza, por considerala “desproporcionada” e “contraria ás máis elementais normas do Dereito Internacional”… e tamén para condenar os “execrábeis ataques de Hamas”.
Lonxe de facer coincidir as palabras cos factos, o PSOE descarta deixar de vender armas a Israel, expulsar o seu embaixador -como Venezuela ou Bolivia- ou boicotar a economía sionista, coa cal o Estado Español ten relacións preferentes.
O partido de Zapatero tamén quer expresar “indignación” pola “dramática situación humanitaria” na Franxa e “pedir” ao Goberno español esforzos diplomáticos para lograr “un cesamento do fogo perdurable”.
A iniciativa foi presentada hoxe en África, na colonia española de Melilla, polo secretario de Cidades e Política Municipal do PSOE, Antonio Hernando, quen esperou que o PP e o resto de forzas políticas apoien a iniciativa en todos os municipios de “España”.
A moción consta de cinco puntos, nos que se propón condenar a posición das dúas partes en conflito por igual e expresar a “profunda indignación” pola situación humanitaria, polo que se esixe ao Goberno de Israel “que cumpra coas súas obrigacións segundo a lexislación internacional”, poña fin ao bloqueo da Franxa e permita a entrada das asistencias e subministracións e da prensa.
Na explicación dos motivos polos que se presenta a moción, o PSOE considera que Istael ten un “dereito lexítimo a defender a súa seguridade”, pero afirma que iso non lle dá “carta branca” e esíxeselle “o inmediato cesamento das accións bélicas”.
Está por ver que plasmación práctica ten a proposta nos Concellos do noso país. O BNG, que cogoberna varios municipios co PSOE, xa anunciou que presentará as súas propias mocións con claves moi diferentes.
En primeiro lugar, o BNG propón “rexeitar os bombardeos e a invasión levados a cabo polo exército de Israel, que evidencian o colofón da blocaxe perpetrada polo Estado israelí contra o pobo de Gaza, en Palestina, constituíndo un crime de guerra”.
En segundo lugar, “transmitir a solidariedade e apoio á representación do pobo de Palestina en Galiza”. Terceiro, “remitir cadanseu escrito de condena ao Presidente e Vicepresidente da Xunta de Galiza, Presidente do Goberno español, Ministerio de Asuntos Exteriores e Embaixada de Israel, coa petición de que o Estado español suspenda as relacións diplomáticas e económicas co Estado de Israel até que non se poña fin á agresión militar, invasión e blocaxe que está a perpetrar na faixa de Gaza, en Palestina”.
Por último, o BNG solicita “que o Estado español inste oficialmente ao cumprimento das reiteradas resolucións da ONU relativas á retirada do Estado de Israel dos territorios ocupados; ao tempo que se demanda, no marco das Nacións Unidas, o envío inmediato dunha misión de observación e interposición co fin de garantir a fin da blocaxe e da agresión militar”.
